ஊழல் மலிந்த 13 நாடுகளின் பட்டியல் : இந்தியாவுக்கும் இடம்

லண்டன் : உலகில் ஊழல் அதிகமாக பரவியுள்ள 13 நாடுகளின் பட்டியலில் இந்தியாவும் இடம் பெற்றுள்ளதாக ஆய்வில் தெரிய வந்துள்ளது. அரசு நிர்வாகமும் இந்த நாடுகளில் மோசமாக உள்ளதாகவும் அதில் தெரிவிக்கப்பட்டுள்ளது.

"இந்தோ - டச் திட்ட மேலாண்மை சொசைட்டி' என்ற அமைப்பு, உலகின் பல்வேறு நாடுகளிலும், ஊழல் குறித்த ஆய்வை மேற்கொண்டது. இந்த ஆய்வின் அடிப்படையில், வாஷிங்டனை மையமாக கொண்டு செயல்படும் மேம்பாட்டுக்கான பயிற்சி மையம் என்ற அமைப்பு ஒரு அறிக்கை தயாரித்தது. இந்த அறிக்கை, சமீபத்தில் லண்டனில் வெளியிடப்பட்டது.இதில் தெரிவிக்கப்பட்டுள்ளதாவது:இந்தியா உள்ளிட்ட 13 நாடுகளில் ஊழல் அதிகமாக பரவியுள்ளது. கவுதமாலா, பராகுவே, கானா, கென்யா, பெரு, அர்ஜென்டினா, ரஷ்யா, ருமேனியா, அல்பேனியா, மல்டோவா, போலந்து, இந்தோனேசியா ஆகியவை இந்த பட்டியலில் உள்ள மற்ற நாடுகள். இந்த நாடுகளில் அரசின் நிர்வாக செயல்பாடும் மோசமாக உள்ளது.


இந்தியாவில் செயல்படும் அரசு சுகாதார மையங்களில் 24 சதவீத பணியிடங்கள் காலியாக உள்ளன. பொதுவான நோய்களுக்கு தேவையான மருந்துகள் இங்கு கிடைப்பது இல்லை. டாக்டர்கள் தங்கள் பணி நேரத்தில் இருப்பது இல்லை. போலி டாக்டர்களின் எண்ணிக்கையும் அதிகமாக உள்ளது.இந்த 13 நாடுகளைச் சேர்ந்த மக்களில் பெரும்பாலானோர், உள்ளூர் போலீசாருக்கு லஞ்சம் கொடுப்பவர்களாக உள்ளனர். இவ்வாறு ஆய்வில் தெரிவிக்கப்பட்டுள்ளது.

மானாவாரிகள் மறைந்த மர்மம் என்ன?

இருபத்து ஒன்றாவது நூற்றாண்டில் மனித சமுதாயம் பறிகொடுத்த இயற்கைவள இழப்புகளில் இந்தியாவைப் பொருத்தவரை உடல் வளத்துக்கும், நலவாழ்வுக்கும் அடிப்படையாயிருந்தவை மானாவாரி உணவுப்பயிர்களான புஞ்சைத் தானியங்களும் பருப்புவகைப் பயிர்களும் என்றால் அது மிகை இல்லை.

மணல் கொள்ளையைப் பற்றிக் கேள்விப்பட்டிருக்கிறோம். மக்களுக்கு ஊட்ட உணவை விளைவித்துத்தரும் சத்தான மானாவாரி மண் இன்று கொள்ளை போவதைப் பற்றி அதிகம் கேள்விப்பட்டிருக்க முடியாது. நாலுவழிச் சாலைகளும் எட்டுவழிச் சாலைகளும் உலக வங்கிக் கடனில் உருப்பெறுவது எவ்வளவு தூரம் தேவை என்று புரியவில்லை. நல்லுணவு விளைந்த மண்ணெல்லாம் விலை பேசி வீதி சமைக்கப்படுகிறது. மானாவாரிப் பயிர் சாகுபடி செய்து மகிழ்ந்த விவசாயிகள் வாழ்ந்த நாடு நமது பாரதம்.

இந்த இருபத்தி ஒன்றாவது நூற்றாண்டு இந்திய விவசாயிகள் நிலத்தை விற்பதில்கூட ஏதோ ஒரு நியாயம் உண்டு. ஆனால், மண்ணை விற்று மகிழ்வதில் என்ன நியாயம் உள்ளது? சாதாரணமாக ஒன்றும் விளையாத சுண்ணாம்பு மிகுந்த சரளை மண்ணைச் சாலை அமைக்கப் பயன்படுத்துவார்கள். இப்போது சரளை கிடைக்காமல் நன்கு பயிர் விளையக்கூடிய செவ்வல் பூமியெல்லாம் சாலையாகும் கொடுமையை எங்கு போய் முறையிடுவது?

இந்தியாவில் பசுமைப்புரட்சி அறிமுகமான இருபதாம் நூற்றாண்டின் பிற்பகுதியில் - குறிப்பாக 1980-க்குப் பின்னர், பல வேறு காரணங்களினால் மானாவாரிகள் மறைந்தன.

பிரிட்டிஷ் இந்திய ஆட்சியில் மைய வேளாண்மை அமைச்சரகம் உருவான காலகட்டத்தில் - இருபதாம் நூற்றாண்டுத் தொடக்கத்தில் - இந்தியாவின் விளைநில வரைபடம் தயாராகிப் பயிர் மண்டலங்கள் உருவாயின. முற்றிலும் வறட்சி, பகுதி வறட்சி, பாசனம் என்று விளைநிலம் தரம் பிரிக்கப்பட்டு தட்பவெப்பம், மண்ணுக்கு ஏற்ற பயிர் என்ற அடிப்படையில் பயிர்ப்பஞ்சாங்கம் வெளியிடப்பட்டது. இந்த அடிப்படையில் வறட்சிப்பகுதிப் பயிர்களை வேறு பெயரில் சொல்வதானால் மானாவாரிப் பயிர்கள் என்று சொல்லலாம்.

1951 முதல் 1970 வரை இந்தியாவின் சாகுபடித் திட்டத்தில் சுமார் 70 சதம் புஞ்சைப் பயிர்களும் பயறுவகைப் பயிர்களும் சாகுபடியாகும் மானாவாரி நிலங்களே அதிகம் இருந்தன. குறைந்த செலவில் நிறைந்த மகசூல் பெற்ற காலம் மலையேறிவிட்டது. பருவம் தவறாமல் மழையும் பெய்தது. பத்தாண்டுத் தொகுதியில் ஓராண்டு மானாவாரி ஏமாற்றி விடும். மழைப்பொழிவு குறையும் வாய்ப்பு உண்டு.

பயிர் மண்டல அடிப்படையில் சுமார் 70 சதவீத நிலம் அமைந்துள்ள மானாவாரி மிகுந்த மாநிலங்களில் தமிழ்நாடும் ஒன்று. பின்னர் ஆந்திர மாநிலத்தின் மேற்குப் பகுதி, கர்நாடகம், மகாராஷ்டிரம், மத்தியப்பிரதேசம் அடங்கிய தக்காணப் பீடபூமி, தார்ப்பாலைவனம் அடங்கிய ராஜஸ்தானம் ஆகியவை. அத்தோடு ஹரியாணா, பஞ்சாப் மாநிலங்களின் மாபெரும் அணைக்கட்டு வழங்கும் கால்வாய்ப் பாசனம் ஏற்படுவதற்கு முற்பட்ட சூழலில்

மானாவாரிப் பயிர்களே பரவலாயிருந்தன. பயிர் மண்டலங்கள் மானாவாரி என்றும் பாசனம் என்றும் வேறுபட்டன. மானாவாரி என்பது பருவமழையை நம்பிச் செய்யப்பட்ட விவசாயம். பாசனம் என்பது உரிய பட்டத்தில் ஆறு, குளம், ஏரி, கிணறு ஆகியவற்றின் நீரையும் சேர்த்து இயங்கிய விவசாயம். உண்மையில் முற்காலப் பாசன ஆதாரங்களான ஆற்றுவெள்ளம், ஏரி, குளம் எல்லாம் பருவமழையை நம்பி இயங்கியது.

இப்படிப்பட்ட பாசன நிலங்களில் நெல், கோதுமை, கரும்பு பயிராயின. அறுவடைக்குப் பின் நஞ்சையில் புஞ்சையாகப் பருப்புவகைப் பயிர்களான உளுந்து, பாசிப்பயறு, காராமணி, வேர்க்கடலை போன்றவற்றுடன் கேழ்வரகும், மக்காச்சோளமும் பயிராகும். சற்று அதிக பாசன வசதி இருப்பின் கோடைகால இறைவைப் பயிர்களாகவும் சாகுபடியாகும்.

மானாவாரியில் சோளம், கம்பு, சிறு தானியங்களான தினை, சாமை, பனிவரகு என்ற காடைக் கனி, வரகு, குதிரைவாலி ஆகியவற்றுடன் துவரை, கொள்ளு, கடுகு, எள் ஆகியவை பயிராகும்.

பசுமைப்புரட்சியின் முன்னோட்டமாக மாபெரும் அணைக்கட்டு திட்டங்கள் 1950 - 60 காலகட்டத்தில் உருப்பெற்று கால்வாய்ப் பாசனம் மானாவாரி நிலங்களுக்குக் கொண்டு செல்லப்பட்டது. ஒரு பகுதி புஞ்சை நிலங்கள் நஞ்சையானபோது வடமாநிலங்களில் பருப்பு சாகுபடியும், தானிய சாகுபடியும் குறிப்பாக கம்பு, இயல்பாக வளரக்கூடிய தீவனப் புற்கள் ஆகியவை மறைந்தன. நெல் சாகுபடி அறிமுகமானது.

÷வடமாநிலங்களில் பருப்பும், புஞ்சை தானியங்களும், தீவனப் புற்களும் விளைந்த இடங்களில் ஆற்று நீர்க்கால்வாய்கள் வந்ததும் நெல், கோதுமை, மக்காச்சோளம் பயிரிட்டுப் பயிர் மண்டலத் திட்டமே மாற்றப்பட்டது. பொதுவாக, இன்று நெல் விளையும் மேற்கு உ.பி., பஞ்சாப், ஹரியாணா மாநிலங்களில் மக்கள் கோதுமையையே முழு உணவாக உண்பார்கள். மலைப்பகுதிகளில் சிறப்புமிக்க பாசுமதி நெல் விளையும். உதாரணமாக,டேராடூன், சிம்லா, ஹிமாசலப் பிரதேசம், பாகிஸ்தானை ஒட்டிய சிந்து நதியின் மையப்பகுதிகளில் பாசுமதி நெல் சாகுபடி குறைந்த நீர் செலவில் பயிராகும்.

பிரியாணிக்கு மட்டுமே பாசுமதி அரிசி பயனாகும். அன்றாட உணவுத்திட்டத்தில் அரிசி கிடையாது. இம்மக்கள் அதிகமாகப் பருப்புவகைகளை உண்டு ஆரோக்கியமாக வாழ்ந்தார்கள். ஆனால், இன்று அரசின் கொள்முதல் திட்டத்துக்காக மோட்டா ரக நெல் சாகுபடி செய்வதுடன், அவர்களுக்கு நெல் முக்கிய வணிகப்பயிராகிவிட்டது. உபரி வைத்துக் கொள்ளாமல் அனைத்தையும் விற்றுவிடுவார்கள். இதனால் அங்குள்ள பயிர்த்திட்டம் மாறி புஞ்சை - மானாவாரி பலம் இழந்தது.

தமிழ்நாட்டை எடுத்துக்கொண்டால் 1970-வரை இங்கொன்றும் அங்கொன்றுமாகக் கிணறுகளில் ஏற்றம், கமலை தென்பட்டன. தமிழ்நாட்டில் நீர்ச்செலவு அதிகமுள்ள நெல்லும் கரும்பும் மெல்ல மெல்ல பழைய மானாவாரி நிலங்களை ஆக்கிரமித்தன. வடதமிழ்நாட்டில் குறிப்பாக செங்கல்பட்டு, காஞ்சிபுரம், திருவள்ளூர், வேலூர், திருவண்ணாமலை, விழுப்புரம், கடலூர் மாவட்டங்களில் ஏரி நீர்ப்பாசனமும், கிணற்று நீர்ப்பாசனமும் விளங்கி வந்தன. நீர்ச் செலவுள்ள பயிர் சாகுபடித் திட்டத்தில் கரும்பும் நெல்லும் பெற்ற முக்கியத்துவத்தினால் முதலில் பம்ப் செட் வந்தது. மேல்மட்ட நீர் கிடைக்காதபட்சத்தில் ஆழ்துளைக் கிணறுகள் வந்தன.

தஞ்சை மாவட்டத்தில் ஆழ்துளைக் கிணறுகள் அறிமுகமாயின. ஏரிநீர் ஆழ்துளைக் குழாய்களுக்கு ரீசார்ஜ் ஆனதால் மானாவாரி நிலங்களில் முன்பு பயிரான புஞ்சை தானியங்களும், பருப்பு வகைப் பயிர்களும் வழக்கொழிந்தன. மானாவாரி ஏரிகள் சுத்தமாக வறண்டு ஆக்கிரமிப்புக்கு உள்ளாயின.

இந்தக் காலகட்டத்தில் மற்றுமொரு நிகழ்ச்சியும் டென்மார்க் உதவியுடன் நிகழ்ந்தது. சமூகக்காடு வளர்ப்பு என்ற போர்வையில் மானாவாரி ஏரிகளில் கருவேல மரங்களை நட்டார்கள். ஏரிகளைச் செப்பனிட்டு நீர்வரத்துப் பகுதிகளில் புற்களை வளர்த்து - நீர்வரத்துக் கால்வாய்களைத் தூரெடுத்து, ஏரிகளின் கரைகளில் மரங்களை நடுவது நல்ல திட்டம். ஆனால், முதல்கட்டமாக ஏரியிலேயே மரம் நட்டு அதன் விளைவாய் ஏரி தூர்ந்தவுடன் ப்ளாட் போட நல்ல வசதியை டென்மார்க் - டேனிஷ் ப்ராஜக்ட். முப்பது ஆண்டுகளுக்கு முன்பு செய்து வழிகாட்டியுள்ளது.

மானாவாரி நிலங்கள் மாயமாய் மறைந்து முழுக்க முழுக்கப் பாசனத்தையே நம்பிச் செய்யப்பட்டு வரும் விவசாயத்தில் அரிசி உற்பத்தியும் சர்க்கரை உற்பத்தியும் உயர்ந்திருக்கலாம். சத்து மிகுந்த உணவு உற்பத்தி மறைந்து நோய்க்குறியுள்ள உணவு உற்பத்தி முடுக்கிவிடப்பட்டது.

மூன்றாவதாக, மக்காச்சோள சாகுபடி. மிகவும் சத்து நிரம்பிய இருங்குச்சோளம், வெள்ளைச்சோளம் பயிரான நிலங்களில் இன்று மக்காச்சோளம் காட்சி தருகிறது. மக்காச்சோளம் மாட்டுக்கும் கோழிக்கும் மட்டுமல்ல. பல கலப்படங்களுக்கு வித்து.

பழங்கள் விளையாத அமெரிக்காவில் சிந்தட்டிக் ஸ்க்வாஷ் பிரபலம். மக்காச்சோள மாவு ஸ்டார்ச்சில் கந்தக அமிலத்தைக் கொட்டி செயற்கைப் புரதம், சர்க்கரை சேர்த்து ஆரஞ்சு வாசனைத்தூள் தூவி ""ஜிங்கோ'', ""பிங்கோ'' என்று பெயர்வைத்து நமக்கு இறக்குமதி செய்வார்கள்.

அதை ஆஹா, ஓஹோவென்று அதிக விலை கொடுத்து வாங்கும் இந்திய நடுத்தர வர்க்கம் புற்றுநோயையும் இதய நோயையும் விலைகொடுத்து வாங்குகிறது. நம்மிடம் எலுமிச்சை, திராட்சை, நன்னாரி, நெல்லிக்காய், தர்பூஸ், மாம்பழம் என்று கணக்கில்லாத ரகங்கள் உள்ளனவே.

மானாவாரி சாகுபடி மறைந்துவிட்டதால், துவரை, வேர்க்கடலை, உளுந்து, பாசிப்பயறு போன்ற உற்பத்தி பெருமளவு குறைந்துவிட்டது. உண்மையில் வேர்க்கடலை, பருப்புவகையாகும். அதாவது லெக்யூம்ஸ் என்பார்கள். பொதுவாக தானியப் பயிர்கள் அறுவடையானதும் லெக்யூம்ஸ் பயிர்களைச் சாகுபடி செய்துவிட்டு மீண்டும் நெல், கேப்பை, கோதுமை பயிராகும்போது 50 சதம் தழைச்சத்து செலவில்லாமல் கிட்டும். அந்த அளவில் பருப்புவகைப் பயிர்கள் காற்றில் உள்ள நைட்ரஜனை வேரில் சேமிக்கும்.

பருப்பு விதைகளை ரைசோபியம் நுண்ணுயிரிக் கலவையில் நேர்த்தி செய்து விதைத்தால் பருப்பு விளைச்சலும் கூடுதலாகும். நமது முன்னோர்கள் கடைப்பிடித்த பயிர்ச்சுழற்சி மானாவாரி நிலங்களில் மட்டுமல்ல, பாசன நிலங்களிலும் உண்டு.

இறுதியாக ஒரு விஷயம். நம்ம ஊர்மக்கள் சாம்பார் பிரியர்களாக இருக்கலாம். சாம்பாருக்குத் துவரம்பருப்பு வேண்டும். முன்பு சாம்பாரில் கடலைமாவு கலப்படம் செய்வார்கள். கடலைமாவில்கூட பட்டாணி மாவு கலந்திருக்கும். துவரையைவிட கடலைப்பருப்பு விலை மலிவு. அதைவிடப் பட்டாணி இன்னமும் மலிவு. இப்போது கலப்படப் பருப்புகளும் விலையேறிவிட்டது. பட்டாணிமாவைவிட விலை மலிவான மக்காச்சோள மாவு கலப்படம் பெருகிவிட்டது. அது மஞ்சள் நிறத்தில் உள்ளதால் கலந்தால் தெரியாது.

மாடும் மனிதனும் ஒன்றாகிவிட்ட நிலை இன்று! மக்காச்சோள மாவைத் தவிட்டுடன் பிசைந்து கறவைப்பசுக்களுக்கு வழங்குவது உண்டு. கையேந்தி பவன் தொடங்கி கந்தவிலாஸ் ஓட்டல் வரை சாம்பாரில் மக்காச்சோள மாவு கலந்திருக்கும் வாய்ப்பு உண்டு. நல்ல மணமான துவரம்பருப்பில் ருசியான சாம்பார் தினமும் வேண்டும் என்றால், மீண்டும் மானாவாரிச் சாகுபடியை ஊக்குவிப்பதுதான் வழி. இது அரசின் கடமை என்பதைப் பொறுப்புள்ள ஆட்சித் தலைவர்களும் உணர்ந்து, ஆக்கபூர்வமாக நல்ல சத்துள்ள புஞ்சைத் தானியம் மற்றும் பருப்பு சாகுபடிக்குப் புத்தூக்கம் நல்குவது, நாட்டு மக்களுக்கு நல்லது.

---- > மிக்க நன்றி Dinamani

அரசு பஸ்களில் கட்டணம் பலவிதம் :வண்ணங்களில் மாற்றம்:பயணிகள்வாட்டம்

ஒரே தூரத்திற்கு செல்ல தமிழகத்தில் சாதாரண கட்டண பஸ்கள், எல்.எஸ்.எஸ்., பஸ்கள், டீலக்ஸ் பஸ்கள், பாயின்ட் டூ பாயின்ட், எக்ஸ்பிரஸ் மற்றும் தாழ்தள சொகுசு பஸ்கள் என பலவிதமாக பஸ்கள் இயக்கப்படுகின்றன. ஒரே தூரம்... ஒரே பயணி... ஆனால்... பஸ்கள் மட்டும் மாறுபடுகின்றன. பயணி ஏறும் பஸ்சுக்கேற்ப கட்டண விகிதம் மாறுபடுகிறது.

சாதாரண டவுன் பஸ்சில் ஏறினால், குறைந்தபட்ச கட்டணம் ரூ.2, எல்.எஸ்.எஸ்.,சில் ஏறினால் ரூ.2.50, தாழ்தள சொகுசு பஸ்சில் ஏறினால் ரூ.5 என கட்டண விகிதங்கள் அதிகரிக்கின்றன. கட்டணம் அதிகமாக கொடுப்பதால் பயணிகளுக்கு எவ்வித பிரயோஜனமும் இருப்பதில்லை; சாதாரண பஸ்களைப் போலவே, மற்ற பஸ்களும் அனைத்து ஸ்டாப்புகளிலும் நின்று செல்கின்றன; குறிப்பிட்ட தூரத்தை அடைய அதே நேரமாகிறது. ஆனால், கட்டணங்கள் மட்டும் அதிகம். இதன் காரணமாக, எல்.எஸ்.எஸ்., மற்றும் தாழ்தள சொகுசு பஸ்களில் பயணிக்க பொதுமக்கள் தயங்குகின்றனர். பயணிகள் இல்லாமல் காற்று வாங்குகிறது.

இதைப்பற்றிய முழு விபரம்:சாதாரண டவுன் பஸ் என்பது நகரில் இருந்து அதிகபட்சமாக 35 கி.மீ., தூரம் இயக்கப்படுகிறது. இதில், கி.மீ.,க்கு 28 காசுகள் வீதம் குறைந்தபட்சம் நான்கு கி.மீ., தூரத்தை முதல் ஸ்டேஜ்ஜாக கணக்கீடு செய்து, 2.00 ரூபாய் குறைந்தபட்ச கட்டணமாக வசூலிக்கப்படுகிறது. அதற்கடுத்த ஒவ்வொரு ஸ்டேக்கும் மூன்று கி.மீ., தூரத்தை ஒரு ஸ்டேஜ்ஜாக கணக்கிட்டு கட்டணம் வசூலிக்கப்படுகிறது. இப்பஸ்கள், அனைத்து நிறுத்தங்களிலும் நின்று செல்கின்றன.

விதிமுறை மீறும் எல்.எஸ்.எஸ்.,: சாதாரண பஸ்களில் வசூலிக்கப்படும் கட்டணத்தை காட்டிலும், கூடுதலாக 50 காசுகள் வசூலிக்கப்படுகின்றன. குறைந்தபட்சம் ரூ. 2.50 காசாக எல்.எஸ்.எஸ்., பஸ்களில் கட்டணம் வசூலிக்கப்படுகிறது. எல்.எஸ்.எஸ்., என்பது "லிமிட்டெட் ஸ்டாப் சர்வீஸ்'. குறிப்பிட்ட நிறுத்தங்களில் மட்டும் நின்று செல்ல வேண்டும். இந்த பஸ்கள் எல்லா நிறுத்தங்களிலும் நின்று சாதாரண டவுன் பஸ்களை போல செல்கின்றன.ஆனால், கட்டணம் மட்டும் அதிகமாக வசூலிக்கப்படுகிறது. இந்த பஸ்சுக்கு நீலம் மற்றும் பச்சை நிற வண்ணங்கள், வரி வரியாக பூசப் பட்டுள்ளன. இந்த அடையாளத்தை காட்டியும், பஸ்சில் உள்ள வண்ணத்தை காட்டியும், பஸ்சுக்கு முன் எல்.எஸ்.எஸ். என்று எழுதப்பட்டிருப்பதை காட்டியும் பயணியிடம் இருந்து கூடுதல் கட்டணம் வசூலிக்கப்படுகிறது. பயணிக்கென்று எந்த வசதியும் இல்லை. சாதாரண பஸ்களில் கடைபிடிக்கப்படும் ஸ்டேஜ் மற்றும் கி.மீ., தூரமே இதில் கடைபிடிக்கப்படுகிறது.

"டீலக்ஸ்' பஸ்கள்: சாதாரண பஸ்களில் வசூலிக்கும் கட்டணத்தை குறிப்பிட்டு, அதன் அடிப்படையில் "டீலக்ஸ்' பஸ் கட்டணம் நிர்ணயிக்கப்பட வில்லை. எல்.எஸ்.எஸ்., பஸ்களின் குறைந்தபட்ச கட்டணத்தை குறிப்பிட்டு, அதிலிருந்து இரண்டு மடங்கு தொகை கட்டணமாக வசூலிக்கப்படுகிறது. அதன்படி, "டீலக்ஸ்' பஸ்களில் குறைந்தபட்ச கட்டணம் ஐந்து ரூபாய். ஆனால், சாதாரண பஸ்களில் பின்பற்றப்படும் ஸ்டேஜ்களே இதிலும் பின்பற்றப்படுகின்றன. பஸ்சின் முகப்பில் மட்டும் "டீலக்ஸ்' என்று எழுதப்பட்டிருக்கும். பயணிக்கென்று எந்தவொரு சொகுசு வசதியும் இல்லை.

தாழ்தள சொகுசு பஸ்: இவ்வகை பஸ்களில், படிக்கட்டுக்கள் தாழ்வாக உள்ளன. வயோதிகர்கள் மற்றும் பெண்கள் பயன்படுத்துவதற்கு எளிதாக உள்ளன. பயணிகளுக்கு வேறெந்த வசதியும் இல்லை. குறைந்தபட்ச கட்டணமாக ஐந்து ரூபாய் வசூலிக்கப்படுகிறது. சாதாரண பஸ் கட்டணத்தை விட, மூன்று ரூபாய் அதிகம்.குறிப்பிட்ட தூரத்தை அடைய, ஒரே நேரத்தை எடுத்துக் கொள்ளும் இவ்வகை பஸ்களில் வெவ்வேறு விதமான கட்டணங்கள் வசூலிக்கப்படுவது பயணிகள் இடையே அதிருப்தியை ஏற்படுத்தியுள்ளது. சாதாரண பஸ்கள் பலவும் "டஞ்சனாகி' விட்டன; இந்நிலையில், தாழ்தள சொகுசு பஸ்களை அதிகளவில் இயக்குவதன் மூலம் கூடுதல் கட்டணங்களை பயணிகள் தலையில் சுமத்துவதாக, போக்குவரத்து துறை மீது குற்றச்சாட்டு எழுந்துள்ளது.

குழப்பும் கட்டணங்கள்: சாதாரண பஸ்; எல்.எஸ்.எஸ்., தாழ்தள சொகுசு பஸ்; எக்ஸ்பிரஸ் என பஸ்களின் பெயரை வெவ்வேறு விதமாக குறிப்பிட்டு, பஸ்களின் நிறத்தையும் மாற்றி, கட்டணம் அதிகரிக்கப்பட்டுள்ளது. கட்டணம் வசூலிக்க, தமிழக அரசின் மோட்டார் வாகன விதிமுறையில் எந்தவொரு சிறு குறிப்பும் இல்லை. இதை எதிர்த்து பொதுநல அமைப்புகள் போட்ட வழக்குகள் அனைத்தும் கோர்ட்டில் நிலுவையில் உள்ளன.தமிழக அரசின் மோட்டார் வாகன விதிமுறையில், சாதாரண டவுன் பஸ்கள் மற்றும் எக்ஸ்பிரஸ் டவுன் பஸ்களை இயக்குவதற்கு கட்டணம் நிர்ணயிக்க மட்டுமே போக்குவரத்து துறையினர் பரிந்துரைக்க வேண்டும். அதன் பேரில், கலெக்டர் பஸ் கட்டணத்தை நிர்ணயம் செய்ய வேண்டும்; அத்தொகை, அரசு போக்குவரத்து கழகத்தால் டிக்கெட் கட்டணமாக வசூலிக்கப்பட வேண்டும்.எந்த பரிந்துரையோ, நிர்ணயமோ செய்யாமல் டீலக்ஸ், எல்.எஸ்.எஸ்., லக்சுரி, பாயின்ட் டூ பாயின்ட் போன்ற பெயர்களில் பல வண்ணங்களை பஸ்களுக்கு பூசி, விதவிதமான கட்டணங்களை பொதுமக்களிடம் வசூலித்து வருகிறது, அரசு போக்குவரத்து கழகங்கள்.

போக்குவரத்து துறை அதிகாரிகள் கூறியதாவது:சாதாரண கட்டண பஸ்கள் அனைத்து நிறுத்தங்களிலும் நின்று செல்கின்றன. எல்.எஸ்.எஸ்., பஸ், ஒரு நிறுத்தம் விட்டு ஒரு நிறுத்தம் நின்று செல்ல வேண்டும் என்பதே விதிமுறை. ஆனால், எல்லா நிறுத்தங்களிலுமே பயணிகள் கைகாட்டுவதால், எல்.எஸ்.எஸ்., பஸ்கள் பயணிகளை ஏற்றிச் செல்ல மறுப்பதில்லை. இதனால், எல்.எஸ்.எஸ்., பஸ்கள், எல்லா நிறுத்தங்களிலும் நின்று பயணிகளை ஏற்றிச் செல்கின்றன.சாதாரண கட்டண பஸ்களை விட, எல்.எஸ்.எஸ்., பஸ்கள் புறப்பட்ட இடத்தில் இருந்து, சேருமிடத்தை 10 நிமிடங்கள் முன்னதாக அடைய நேர அட்டவணை உள்ளது. ஆனால், போக்குவரத்து நெரிசல் மற்றும் அனைத்து நிறுத்தங்களிலும் பஸ்கள் நின்று பயணிகளை ஏற்றி, இறக்கி வருவதால், சாதாரண கட்டண பஸ்கள், எல்.எஸ்.எஸ்., பஸ்கள் இரண்டின் போக்குவரத்து நேரங்களும் ஒரே மாதிரியாக அமைகின்றன.

தாழ்தள சொகுசு பஸ்களை பொறுத்தவரை, சாதாரண பஸ்களை விட பல்வேறு வசதிகள் உள்ளன. இப்பஸ்களில் பயணிக்கும்போது பயணிகளுக்கு நல்ல காற்றோட்டம் கிடைக்கும். குண்டும், குழியுமான ரோடுகளில் செல்லும்போது, இருக்கையில் அமர்ந்து பயணிப்பவர்களுக்கு பாதிப்பில்லாத வகையில் இருக்கை வசதி உள்ளது. படிக்கட்டுகள், அரை அடி உயரத்தில் ஏறி, இறங்க வசதியாக உள்ளது.சாதாரண கட்டண பஸ்கள் மற்றும் எல்.எஸ்.எஸ்., பஸ்களில் உள்ள உயரமான படிக்கட்டுகளில் ஏறி இறங்க முடியாத முதியவர்களுக்கு சொகுசு பஸ் அதிகளவில் உதவும். மாசு கட்டுப்பாடு அடிப்படையில், "யூரோ த்ரீ' என்ற முறையில் புகையில்லாத இயக்கமாக தாழ்தள சொகுசு பஸ் ஓடுகிறது; "யூரோ த்ரீ' முறையில் டீசல் செலவு 27 காசுகள் கூடுதலாக உள்ளது. மற்ற டீசலை சொகுசு பஸ்சில் பயன்படுத்த முடியாது. இத்துடன், சில உயர் ரக தொழில்நுட்பங்கள், எலக்ட்ரானிக் சிஸ்டத்தில் இப் பஸ்கள் இயக்கப்படுகின்றன. இதன் காரணமாகவே, பயண கட்டணம் இரட்டிப்பாகவும், சுற்றுச்சூழல் பாதுகாப்புக்காக ஒரு ரூபாய் கூடுதலாக கட்டணம் வசூலிக்கப்படுகிறது.எக்ஸ்பிரஸ் பஸ்கள், சில நிறுத்தங்களில் நிறுத்தப்படுவதில்லை. இதற்காக, கி.மீ.,க்கு 28 காசு வீதம் கூடுதலாக்கப்படுகிறது. குறைந்தபட்ச கட்டணம் மூன்று ரூபாய் 50 காசில் இருந்து 5.00 ரூபாயாக உள்ளது, என்றனர்.

பயணிகள் குமுறல்: சென்னை, மதுரை, கோவை போன்ற பெருநகரங்களில் இயக்கப்படும் தாழ்தள சொகுசு பஸ்கள் செல்லும் ரோடுகள் குண்டும், குழியுமாக இருப்பதில்லை. தவிர, இப்பஸ்களில் முதியவர்கள் ஏறும் வசதிக்காக அரையடி உயரத்தில் படிக்கட்டுகள் உள்ளது என்றாலும், இப்பஸ்களில் பயணிப்பவர்கள் எல்லாருமே முதியவர்கள் அல்ல.சுற்றுச்சூழலை பாதிக்காத வகையில், "யூரோ த்ரீ' முறையில் இயக்குவது மட்டுமே ஏற்றுக்கொள்வதாக உள்ளது. இருப்பினும், அது அரசின் பொறுப்பு. அதற்காக, அக்கட்டணத் தை பயணிகளில் தலையில் சுமத்துவது நியாயமற்றது.

அரசு, என்ன செய்யலாம்! மக்களிடம் இருந்து பணத்தை வலுக்கட்டாயமாக "பறித்து', பணம் சம்பாதிப்பது அரசின் வேலையல்ல. மக்களுக்கு சேவையாற்றும் சேவகனாகவே, அரசு நிர்வாகம் இருக்க வேண்டும். மதுக்கடை நடத்துவதில் லாபம் பார்க்கலாம். போக்குவரத்து துறையில் லாபம் பார்ப்பதில், மக்களிடம் அதிருப்தியை சம்பாதிக்கக் கூடாது; அது, அரசுக்கு ஆபத்தை விளைவிக்கும். ஏனெனில், அவசரத் தேவைக்கு அடித்தட்டு மக்கள், ஓரிடத்தில் இருந்து இன்னொரு இடத்துக்குச் செல்ல பயணிப்பது அரசு பஸ்சில் தான். மக்களுக்கு சொந்தமாக கார் களோ வேறு வாகனங்களோ இருப் பதில்லை. மக்கள், அரசு மீது அதிருப்தி அடைந்தால், நிர்வாகத் துக்கு அழகல்ல. அதேநேரத்தில், சொகுசு பஸ் என்ற பெயரில், பயணிகள் இல்லாமல்... கண்டக்டரும், டிரைவரும் மட்டுமே சென்று கொண்டிருந்தால், போக்குவரத்து கழகத்துக்கு நஷ்டமே மிஞ்சும். அதற்கு பதிலாக, சாதாரண பஸ் கட்டணத்தையே, நிறம் மாற்றப்பட்ட, பெயர் மாற்றப்பட்ட மற்ற பஸ்களுக்கும் நிர்ணயித்து இயக்கினால், பயணிகளும் பயணிப்பர்; அப்பயணம் சொகுசான, சுகமான பயணமாக அமையும்.தமிழக முதல்வர், உத்தரவிடுவாரா?

அமைச்சரின் பேச்சுக்கு எதிர்ப்பு!"தமிழகத்தில் உள்ள பஸ்கள் நல்ல தரத்துடனும், சொகுசாகவும் இருப்பதால் மட்டுமே, பயணிக்கும் மக்களின் எண்ணிக்கை அதிகரித்துள்ளது' என, போக்குவரத்து துறை அமைச்சர் நேரு கூறி வருகிறார். இதற்கு, "மக்கள், தங்களது அவசர தேவையை நிறைவு செய்வதற்காகவும், அன்றாட பயன்பாட்டுக்கும் மட்டுமே பஸ்களில் பயணிக்கின்றனர்' என்று கோவை கன்ஸ்யூமர் வாய்ஸ் அமைப்பு கருத்து தெரிவித்துள்ளது.

அந்த அமைப்பின் செயலாளர் லோகு கூறியதாவது:கோவையில் சமீபத்தில் நடந்த விழா ஒன்றில் பங்கேற்ற அமைச்சர் நேரு பேசியபோது, "தமிழகத்தில் மூன்றாண்டுக்கு முன் 10 ஆயிரத்து 352 புதிய பஸ்கள் வாங்கப்பட்டன. இந்தாண்டு 3,000 பஸ்கள் வாங்கப்பட்டன. மேலும் 3,000 புதிய பஸ்கள் வாங்கப்படும். பஸ்கள் வாங்க, தமிழக முதல்வர் சிறப்பு நிதியாக 1,000 கோடி ரூபாயை ஒதுக்கீடு செய்துள்ளார்."அ.தி.மு.க., ஆட்சியில் அரசு பஸ்சில் பயணிக்கும் மக்களின் எண்ணிக்கை நாளொன்றுக்கு ஒரு கோடியே 64 லட்சத்து 59 ஆயிரமாக இருந்தது. தற்போது, பஸ்சின் தரம் உயர்ந்துள்ளதால், மக்கள் விரும்பி பயணிக்கும் வகையில் பஸ்கள் அமைந்துள்ளன. அரசு பஸ்சில் பயணிக்கும் பொதுமக்களின் எண்ணிக்கை இரண்டு கோடியே ஐந்து லட்சமாக உயர்ந்துள்ளது, என்றார். அமைச்சரின் இக்கருத்தை ஏற்றுக்கொள்ள முடியாது. பொதுமக்கள் தங்களது தேவைக்காக மட்டுமே பஸ்களை பயன்படுத்துகின்றனர்.சொகுசு மற்றும் தரமாக இருப்பதால் மட்டுமே பயணிக்கின்றனர் என்பதை ஏற்றுக்கொள்ள முடியாது. புதிதாக அறிமுகப்படுத்தப்பட்ட தாழ்தள சொகுசு பஸ்சில் பயணிகளுக்கென்று எந்த சொகுசு வசதியும் இல்லை. வழக்கமாக அனைத்து பஸ்களிலும் உள்ள வசதிகளே உள்ளன. டிரைவர், சொகுசாக பஸ்சை ஓட்டுவதற்கு வசதி செய்து கொடுக்கப்பட்டுள்ளது. தானியங்கி கதவுகள் பொருத்தப்பட்டுள்ளன. இவை, கண்டக்டருக்கும், டிரைவருக்கும் செய்து கொடுக்கப்பட்ட வசதியே தவிர பயணிக்கான வசதியல்ல.பஸ்சின் மேற்கூரையில் மட்டும் காற்று வருவதற்காக இரண்டு துளையிடப்பட்டு மூடி போடப்பட்டுள்ளது. எளிதாக பஸ்சில் பயணிகள் ஏறுவதற்கு தாழ்வான படிக்கட்டுகள் அமைக்கப்பட்டுள்ளன. அவ்வசதி, பெரும்பாலான தனியார் பஸ்களில் உள்ளன. இவை தவிர வேறெந்த வசதியும் செய்து கொடுக்கப்பட வில்லை. அவ்வசதியை எதிர்பார்த்தோ, விரும்பியோ பொதுமக்கள், தாழ்தள சொகுசு பஸ்சில் பயணிப்பதில்லை, என்றார்.

பொதுமக்கள் விழித்துக் கொள்வர்!"ரவுண்ட் ஆப்' என்ற பெயரில், சில நுகர்வோர் அமைப்புகளின் ஒப்புதலோடு, பஸ் கட்டணத்தை அரசு போக்குவரத்து கழகம் உயர்த்தியுள்ளது. இதற்கு எதிர்ப்பு தெரிவித்து "கோயமுத்தூர் கன்ஸ்யூமர் காஸ் அமைப்பு', சென்னை ஐகோர்ட்டில் வழக்கு தொடர்ந்துள்ளது.இந்த அமைப்பின் செயலாளர் கதிர்மதியோன் கூறியதாவது:கடந்த 2009 ஆக., 19ல், கோவையில் இருந்து பொள்ளாச்சி, மேட்டுப்பாளையம், திருப்பூர் ஆகிய பகுதிகளுக்கு இயக்கப்பட்ட புறநகர் பஸ்களில் குறைந்தபட்ச கட்டணம் ரூ.3.50 ஆகவும், அதிகபட்ச கட்டணம் 12.50, 10.50, 15.50 ரூபாயாகவும் இருந்தது. இதை "ரவுண்ட் ஆப்' என்ற பெயரில், மாவட்ட நிர்வாகம், அரசு போக்குவரத்து கழக கோவை கோட்டம் இணைந்து, சில நுகர்வோர் அமைப் புகளின் ஒப்புதலை பெற்று, கட்டணத்தை 50 காசுகள் உயர்த்தியுள்ளன. இதற்கு பொதுமக்கள் மத்தியில் கடும் எதிர்ப்பு கிளம்பியது. பொதுமக்களுக்கு இழைக்கப்பட்ட அநீதியை எதிர்த்து சென்னை ஐகோர்ட்டில் வழக்கு பதிவு செய்யப்பட்டுள்ளது; விசாரணையும் நடந்து வருகிறது. அதேபோல், தாழ்தள சொகுசு பஸ் என்ற பெயரில் எந்தவொரு வசதியும் செய்து கொடுக்காமல், பயணிகளிடம் புதிய பஸ்களை மட்டும் அறிமுகப்படுத்தி, சாதாரண பஸ் கட்டணத்தை போல் மூன்று மடங்கு கட்டணம் அதிகரித்து வசூலிப்பது நியாயமற்ற செயல்.நெடுந்தூரங்களுக்கு இயக்கப்படும் பஸ்களில், "எக்ஸ்பிரஸ்' என பெயரிட்டு, கட்டணம் உயர்த்தி வசூலிக்கப்படுகிறது. அதிகாரிகளோ, தெரிந்தும் தெரியாததுபோல் காட்டிக்கொள்கின்றனர். திருவிழா சமயங்களில் சிறப்பு பஸ் என்ற பெயரில் கட்டணம் இரு மடங்கு உயர்த்தப்படுகிறது. இதற்கு மோட்டார் வாகன விதிமுறையில் எந்தவொரு பரிந்துரையோ, உத்தரவோ இல்லை.

"சிறப்பு திருவிழாக்கள் என்ற பெயரில் அதிக கட்டணம் வசூலிக்கக் கூடாது' என்று தமிழக அரசுச் செயலர் அதுல்யா மிஸ்ரா, கடந்த 2009 நவ., 30ல் பிறப்பித்த உத்தரவில் கூறியுள்ளார். இதை மீறி திருவிழா என்ற பெயரில் சிறப்பு பஸ் இயக்கப்பட்டு, அதிக கட்டணம் வசூலித்தால் சம்பந்தப்பட்ட அரசு போக்குவரத்து கழக கோட்ட நிர்வாக இயக்குனர் மீது கடுமையான நடவடிக்கை மேற்கொள்ளப்படும் என்று எச்சரிக்கப்பட்டுள்ளது. ஆனாலும், வசூல் வேட்டை இன்றும் தொடர்கிறது. 15 கி.மீ., தூரத்தில் உள்ள ஊரில் திருவிழா நடந்தாலும், சிறப்பு பஸ் இயக்கி, அதில் வருவாய் பார்ப்பதையே குறிக்கோளாக கொண்டுள்ளது அரசு போக்குவரத்து கழகம். பயணிகளுக்கான வசதி, அவர்களின் நிலை குறித்து சிறிது கூட யோசிப்பதில்லை.மறைமுகமாக மக்கள் மீது பஸ் கட்டணத்தை சுமத்துவதற்கு பதில், முறையாக அறிவிப்பு செய்து உயர்த்தலாம். மக்களிடம் நேர்மையாகவும், வெளிப்படையாகவும் நடந்து கொள்ளலாம். எத்தனையோ இலவசங்களை வாரி வழங்கிய தமிழக அரசு, பொதுமக்கள் அன்றாடம் பயணிக்கும் பஸ் கட்டணத்தில், நெறிமுறை இல்லாத நடைமுறையை பின்பற்றுவது தவறு. இதே நடைமுறையை தொடர்ந்து பின்பற்றினால், மக்கள் எளிதாக விழித்துக் கொள்வர்.இவ்வாறு, கதிர்மதியோன் கூறினார்.


----- > மிக்க நன்றி தினமலர்