எதிரிகளை அதிர வைக்கும் 'மிளகாய் குண்டு' : இந்திய ராணுவத்தில் அறிமுகம்

சென்னை, பரங்கிமலை, ராணுவ அதிகாரிகள் பயிற்சி மையத்தில் சமீபத்தில் நடந்த ஒரு விழாவில் கலந்து கொள்ள வந்த ராணுவ ஊழியர்களுக்கான துணை தலைமை அதிகாரி லெப்டினன்ட் ஜெனரல் பரத்வாஜ் கூறுகையில், 'உலகின் அதிநவீன ஆயுதங்கள் கூட தற்போது இந்திய ராணுவத்தில் உள்ளது' என்றார். இந்நிலையில், உள்நாட்டிலேயே கிடைக்கும் சாதாரண மிளகாயும் ஆயுதமாக மாறி, தற்போது இந்திய ராணுவத்திற்கு பெரும் உதவி செய்ய உள்ளது.

வட மாநில சமையலில் அதிகமாக பயன்படுத்தப்படும் 'பூட் ஜேலோகியா' என்றழைக்கப்படும் ஒருவகை மிளகாய், கட்டை விரல் அளவில் தான் இருக்கும். வடகிழக்கு மாநிலங்களில் அதிகமாக விளைகிறது. இந்த வகை மிளகாய் உலகிலேயே மிகவும் காரம் அதிகம் கொண்டது. இதன் காரத்தன்மை அதிகமாக இருப்பதால், அதற்கு 'பேய் மிளகாய்' (கோஸ்ட் சில்லி) என்று பெயர் விளங்குகிறது. உலகிலேயே அதிக காரத்தன்மை கொண்ட மிளகாய் என்று இந்த மிளகாய், 'கின்னஸ் வேர்ல்டு ரெக்கார்டு' புத்தகத்திலும் இடம் பெற்றுள்ளது. காரத்தின் அளவை அளக்கும் முறையின் கீழ் சோதனை செய்யப்பட்டதில், முதல் தர புகையிலையின் சாறு 2 ஆயிரத்து 500 முதல் 5 ஆயிரம் யூனிட் காரம் கொண்டது. ஜலபினோ மிளகு 2 ஆயிரத்து 500 முதல் 8 ஆயிரம் யூனிட் காரம் உடையது. ஆனால், பூட் ஜேலோகியா

மிளகாயோ ஒரு லட்சத்திற்கும் அதிகமான யூனிட் கார சுவை கொண்டது.

தற்போது, பயங்கர கார சுவை கொண்ட பூட் ஜேலோகியா மிளகாயை, ஒரு ஆயுதமாக மாற்றி, பயங்கரவாதத்திற்கு எதிராக பயன்படுத்த இந்திய ராணுவம் முடிவு செய்துள்ளது. இந்த வகையில், மிளகாய் கையெறி குண்டு தயாரிக்கும் ஆய்வுகள் நடந்து வருகின்றன. 'கண்ணீர் புகையை போல கையெறி குண்டாக இந்த மிளகாயை பயன்படுத்தி எதிரிகளை செயலிழக்கச் செய்யலாம்' என்று பாதுகாப்பு துறை அதிகாரிகள் கூறுகின்றனர். அசாமில் உள்ள ராணுவ பாதுகாப்பு மற்றும் மேம்பாட்டு நிறுவனத்தின் ஆய்வகத்தில் விஞ் ஞானிகளால் தற்போது மிளகாய் எறிகுண்டு தயாரித்து பரிசோதனை செய்யப்பட்டு வருகிறது. பூட் ஜேலோகியா மிளகாயால் தயாரிக்கப்படும் கையெறி குண்டு, நஞ்சு கலக்காத ஒரு ஆயுதம் என்று உறுதியாக கூறலாம். மிளகாய் எறிகுண்டை வீசும் போது வெளிப்படும் கார நெடி, பயங்கரவாதிகளை மிகுந்த எரிச்சலடைய செய்து, அவர்களை மறைவிடத்தில் இருந்து வெளியே வரவழைத்து விடும் என்று ஆராய்ச்சியாளர்கள் கூறுகின்றனர்.

பெண்கள் மீது தற்போது அதிகளவில் தாக்குதல்கள் நடக்கின்றன. தங்களை தாக்குபவர்களை தடுக்கும் வகையில் பெண்கள் பயன்படுத்துவதற்கும், கும்பலை கலைக்க போலீசாருக்கு உதவும் வகையிலும், பூட் ஜேலோகியா மிளகாய் 'ஸ்பிரே'க்கள் தயாரிப்பது தற்போது ஆய்வு நிலையில் உள்ளது. ஆனால், சென்னை மாநகர போலீசார், தனியாக நடந்து செல்லும் பெண்களிடம் வழிப்பறி செய்பவர்களிடம் இருந்து தப்பிக்க மிளகாய் ஸ்பிரேயை பயன்படுத்தலாம் என்று விழிப்புணர்வு ஏற்படுத்தி, அதை தற்போது செயல்படுத்தியும் வருகின்றனர் என்பது குறிப்பிடத்தக்கது.

இஸ்ரேல் நாட்டு தொழில்நுட்பத்தில். சாதனை தரிசு நிலத்தில் விவசாயி கரும்பு சாகுபடி

ப.வேலூர்: தரிசு நிலத்தில், இஸ்ரேல் நாட்டு தொழில்நுட்பத்துடன், புதிய சொட்டு நீர் பாசனம் முறையில் கரும்பு சாகுபடி செய்து ப.வேலூர் பகுதியை சேர்ந்த விவசாயி சாதனை படைத்துள்ளார்.நாட்டில் தற்போது சொட்டுநீர் பாசனம் முறை பரவலாக்கப்பட்டுள்ளது. தண்ணீர் தேவையை கருத்தில் கொண்டு, இத்தகைய பாசனத்தை பெரும்பாலான விவசாயிகள் மேற்கொண்டு வருகின்றனர்.

இதுவரை பூமிக்கு மேல் பைப் அமைத்து அதன் மூலம் சொட்டு நீர் பாசனம் மூலம் விவசாயம் மேற்கொண்டனர். இஸ்ரேல் நாட்டின் தொழில் நுட்பத்தில் பூமிக்கு அடியில் பைப் பதித்து சொட்டு நீர் பாசனம் செய்யும் முறை தற்போது அறிமுகப்படுத்தப்பட்டுள்ளது.அத்தகைய புதிய முறையிலான சொட்டு நீர் பாசனத்தை, முதன் முறையாக ப.வேலூர் அடுத்த கபிலர்மலை யூனியன் கவுண்டம்பாளையத்தை சேர்ந்த விவசாயி அன்பரசு தன் தரிசு நிலத்தில் அறிமுகப்படுத்தி உள்ளார்.இந்த தொழில்நுட்பத்தின் உதவியுடன், ஒரு ஏக்கருக்கு வாய்க்கால் மூலம் நீர் பாய்ச்ச தேவையான நீரை, பூமிக்கு அடியில் பதித்துள்ள சொட்டு நீர் பாய்ச்சும் முறையில் 10 ஏக்கருக்கு பாய்ச்சி விடலாம். ஏக்கர் முழுவதும் 5 மணி நேரத்தில் நீரை பாய்ச்சி விடமுடியும்.

இது குறித்து விவசாயி அன்பரசு கூறியதாவது:தரிசாக கிடந்த நிலத்தில், இந்த புதிய பாசன முறை மூலம் பத்து ஏக்கரில் கரும்பு சாகுபடி செய்துள்ளேன். அதன் மூலம் ஆள்பற்றாக்குறை நீங்குகிறது. ஒரு ஆள் பத்து ஏக்கரில் சாகுபடி செய்துள்ள விவசாயத்தை பார்த்துவிட்டு பின் மற்ற பணிகளில் ஈடுபடமுடியும்.இந்த முறை பாசனத்தில் தண்ணீர் தேவை மிக மிக குறைவு. ஒரு கிணற்று தண்ணீரை வைத்துக்கொண்டு 5 மாதமாக விவசாயம் மேற்கொள்ளப்படுகிறது.

விவசாயத்தை பொறுத்தவரை கூலி ஆட்கள் தேவை அதிகம். இம்முறையில் அதற்கு இடமில்லை. மேலும், பத்து ஏக்கருக்கு வாய்க்கால் பாசனம் மூலம் 24 மணி நேரம் செலவாகும். ஆனால், புதிய தொழில் நுட்பத்தில் தண்ணீர் பாய்ச்ச 5 மணி நேரம் மட்டுமே போதுமானது. பூமிக்கு அடியில் தண்ணீர் சென்று கரும்பின் வேரிலேயே தண்ணீர் பாய்ச்சுவதால், மேலே களை வருவதில்லை.சாதாரணமாக ஒரு ஏக்கருக்கு யூரியா இரண்டு மூட்டை செலவாகும். சொட்டு நீர் பாசன முறையில் தண்ணீர் பாயும் போதே யூரியாவை கலந்து டியூப் மூலம் பாய்ச்சுவதால், பத்து கிலோ மட்டுமே போதுமானது. அதன் மூலம் உரச்செலவும் மிச்சம்.இந்த முறை பாசனத்தில் நேரத்தை மோட்டாரில் செட் செய்து விட்டால், அந்த நேரத்தில் தானாகவே மோட்டார் நின்று விடும். இத்தகைய பாசனத்துக்கு அரசு மானியம் வழங்கி விவசாயிகளை ஊக்குவிக்கிறது.

ஒரு முறை பைப் பூமியில் பதித்து விட்டால் தொடர்ந்து பத்து ஆண்டுகளுக்கு அதை பயன்படுத்தலாம். புதிய சொட்டு நீர் பாசன முறை அமைக்க 1.50 லட்சம் ரூபாய் செலவானது. அதில், 20 சதவீதம் அரசு மானியம் வழங்கியுள்ளது. சாகுபடிசெய்த கரும்பில் 100 டன் மகசூல் கிடைத்துள்ளது. இந்த முறையில் கரும்பு பயிர் மட்டும் அல்லாமல் நிலக்கடலை, மரவள்ளி போன்றவற்றையும் சாகுபடி செய்துள்ளேன். இவ்வாறு அவர் கூறினார்.தரிசு நிலங்களை பிளாட் போட்டு விற்பனை செய்துவரும் நிலையில், மற்ற விவசாயிகளுக்கு அவர் முன்னுதாரமான திகழ்கிறார். விலை போகும் விளை நிலங்கள், மீண்டும் விளை நிலமாக மாற இவரை போல் மற்றவர்களும் முன்வர வேண்டும்.