சூரிய சுனாமியால் பூமிக்கு ஆபத்து வராது-விஞ்ஞானிகள்

சென்னை: சூரிய சுனாமியால் பூமிக்கு எந்தவித பாதிப்பும் ஏற்படாது. பூமிக்கு மேலே உள்ள காந்த வளையம், வெப்பக் கதிர்களை உள்ளே விடாமல் தடுத்து விடும் என்று விஞ்ஞானிகள் தெரிவித்துள்ளனர்.

உலகம் முழுவதும் சூரிய சுனாமி குறித்து மக்களிடையே பெரும் ஆர்வம் ஏற்படுத்தியுள்ளது. அதேசமயம், பூமிக்கு என்னாகுமோ என்ற லேசான அச்சமும் படர்ந்துள்ளது. ஆனால் பயப்படத் தேவையில்லை என்று பல்வேறு விஞ்ஞானிகள் தெரிவித்துள்ளனர்.

இந்தியாவைச் சேர்ந்த பிரபல விண்வெளி ஆய்வாளர் டாக்டர் ராஜ் பல்தேவ் Two Big Bangs Created the Universe என்ற தலைப்பில் கடந்த 2003ல் ஒரு நூலை வெளியிட்டார். இதை அப்போதைய குடியரசுத் தலைவர் [^] அப்துல் கலாம் வெகுவாகப் பாராட்டினார்.

அந்த நூலில், 2006க்கும் 2010ம் ஆண்டுக்கும் இடையே சூரியனிலிருந்து வெப்பக் கதிர்கள் பெருமளவில் பூமியை நோக்கி வரும் என்று கணித்துக் கூறியிருந்தார். தற்போது கிட்டத்தட்ட அதே போன்ற ஒன்று தொடங்கியுள்ளது. இவரை பிரெஞ்சு ஞானி நாஸ்டர்டாமுடன் ஒப்பிட்டுப் பல நூல்கள் வெளியாகியுள்ளது குறிப்பிடத்தக்கது.

இதுகுறித்து பல்தேவ் கூறுகையில், நான் அன்று கூறியதைப் போன்ற நிகழ்வுதான் தற்போது நடந்து வருகிறது. தற்போது நடந்து கொண்டிருப்பதற்கு பெயர் coronal mass [^] ejection என்பதாகும். இது நேரடியாக பூமியைத் தாக்கும் வாய்ப்புகள் உள்ளன. இதை சோலார் சுனாமி என்றும் அழைக்கலாம். விண்வெளியில் பூமியிலிருந்து 93 மில்லியன் மைல்களுக்கு அப்பால் இது நடந்து கொண்டிருக்கிறது.

சூரியனின் ஒரு புள்ளியில், பூமியைப் போல அல்லது பூமியை விட சற்று பெரிதான அளவில் ஏற்பட்டுள்ள வெடிப்பே இதற்குக் காரணம். இது நிச்சயம் மிக ஆபத்தானது என்பதில் சந்தேகம் இல்லை. வழக்கமாக வெளியாகும் வெப்பக் கதிர்களை விட தற்போது மிகப் பெரிய அளவில் வெப்பக் கதிர்கள் வெளியாக இந்த வெடிப்பே காரணம்.

இந்த வெப்பக் கதிர்கள் பூமிக்கு அருகில் வர முடியும். அதேசமயம், பூமியின் காந்தப் புலம் அதற்கு மேல் அது முன்னேற விடாமல் தடுத்து விடும். அதாவது பூமியின் காந்த வளையத்தை அது அடையும்போது வெப்பக் கதிர் வீச்சு புவி காந்தப் புயலாக (geomagnetic storm) மாறும்.

இந்த சூரிய சுனாமியால் பெரும் ஆபத்து ஏற்பட வாய்ப்பில்லை. ஆனால் ஆபத்து இல்லை என்று கூறவும் முடியாது. அதேசமயம் பாதிப்பு பெரிய அளவில் இருக்காது. ஒருவேளை தடுப்புகளைத் தாண்டி பூமியை அது நேரடியாக தாக்கக் கூடுமானால் பாதிப்புகள் பெருமளவில் இருக்கலாம்.

இந்த சூரிய சுனாமியால் செயற்கைக்கோள்கள் முற்றாக அழியக் கூடிய வாய்ப்புகள் உள்ளன. தகவல் தொடர்பு முற்றிலும் சீர்குலையும். எனவே சூரிய சுனாமி தாக்குதலின்போது இவற்றை சற்று செயலிழக்க வைத்திருப்பது நல்லது. இதன் மூலம் பாதிப்புகளை தவிர்க்க முடியும்.

இந்த சூரிய சுனாமியால் பீதி அடையத் தேவையில்லை. அதேசமயம், முன்னெச்சரிக்கை நடவடிக்கைகள் அவசியம் என்றார் பல்தேவ்.

சென்னை பிர்லா கோளரங்க செயல் இயக்குநர் [^] அய்யம்பெருமாள்

சென்னை பிர்லா கோளரங்க செயல் இயக்குநர் அய்யம்பெருமாள் இதுகுறித்துக் கூறுகையில்,

சூரியன் அதிக வெப்பத்தை எப்போதும் கக்கிக்கொண்டே இருக்கிறது. அது வெகு தூரத்தில் இருப்பதால் பூமிக்கு அந்த பாதிப்பு இல்லை. சூரியனின் மத்தியில் ஒரு கோடியே 50 லட்சம் டிகிரி சென்டிகிரேடு வெப்பம் உள்ளது. அதன் வெளிவிளிம்பு பகுதியில் 5 ஆயிரம் சென்டி கிரேடு வெப்பம் உள்ளது. சூரியனில் கரும்புள்ளி உள்ள இடங்களில் வெப்பம் குறைவு என்று அர்த்தம். தற்போது கரும்புள்ளிகள் குறைந்துள்ளன.

சூரியனில் புயல் ஏற்படும். அதாவது வெப்பக்காற்று வீசும். அது பூமியை நோக்கி வரும். கடந்த 2005-ம் ஆண்டு சூரிய புயல் ஏற்பட்டது. அதை விட இப்போது அதிக வெப்பத்தை அது வெளியில் விடுகிறது. இந்த சூரிய புயலின் வெப்பம் பூமியை நோக்கி வந்து கொண்டிருக்கிறது என்பது உண்மை.

பூமிக்கு மேல் காற்று மண்டலம் உள்பட பல மண்டலங்கள் உள்ளன. அந்த மண்டலங்களை தாண்டிதான் இந்த சூரிய புயல் பூமிக்கு வர வேண்டும். அத்தனை மண்டலங்களும் இந்த சூரிய புயல் வேகத்தின் தாக்கத்தை குறைத்து விடும். மேலும் பூமியை சுற்றி காந்த வளையம் உள்ளது. இந்த சக்தி வெப்பத்தை பூமிக்கு வரவிடாமல் தடுத்து விடும். எனவே பூமிக்கும் மக்களுக்கும் இந்த சூரிய புயலால் எந்த வித ஆபத்தும் வராது என்றார்.

வருகிறது 'சோலார் சுனாமி'!

லண்டன்: சூரியனில் ஏற்பட்டுள்ள திடீர் வெடிப்பு காரணமாக பூமி உள்ளி்ட்ட கிரகங்களை மின் காந்த கதிர்வீச்சுக்கள் தாக்கவுள்ளன.

'சோலார் சுனாமி' என்று பெயரிடப்பட்டுள்ள இந்த கதிர்வீச்சால் சில பாதிப்புகள் ஏற்படலாம்.

சூரியனின் மையத்தில் உள்ள கரோனா எனப்படும் அதன் கரு ஹைட்ரஜன், ஹீலியம், ஆக்ஸிஜன், கார்பன், நியான், இரும்பு உள்ளிட்டவைகளால் ஆனது.

இதில் ஹைட்ரஜன் அணுக்கள் ஒன்றாக இணைந்து ஹீலியத்தை உருவாக்குவது தான் சூரியனின் வெப்பத்துக்குக் காரணம். இந்த அணு இணைப்புகளின்போது வெளிப்படும் சக்தி தான் வெப்பமாக வெளிப்படுகிறது.

அப்போது உருவாகும் மிக அதிக சக்தி கொண்ட காமா கதிர்கள் தான் போட்டான்களாக மாறி நமக்கு சூரிய வெளிச்சத்தைக் கொண்டு வருகின்றன. இந்த போட்டான் கதிர்கள் சூரியனின் மையப் பகுதியில் இருந்து அதன் வெளிப்பகுதிக்கு வரவே 10,000 முதல் 1.7 லட்சம் ஆண்டுகள் வரை ஆகும்.

(போட்டானுடன் கூடவே வெளியேறும் இன்னொரு சூரிய துகள் நியூட்ரினோ. இதைப் பற்றி பின்னர் பார்ப்போம். இப்போது விஷயத்துக்கு வருவோம்.)

சூரியனில் நடக்கும் இந்த அணு உலை இணைப்பின்போது உருவாகும் கூடுதலான சக்தியும் வெப்பமும் சூரிய வெடிப்புகளாக அவ்வப்போது வெளியேறுகிறது. அப்போது சூரியனிலிருந்து அதிக வெப்பத்திலான வாயுக்கள் பிளாஸ்மாவாக பீய்ச்சிடிக்கப்படும். (super heated gases தான் பிளாஸ்மா).

இந்த பிளாஸ்மா தன்னுடன் சுமந்து வரும் பயங்கரமான மின் காந்த கதிர்கள் பூமி உள்ளிட்ட மற்ற கிரகங்களுக்கு பெரும் பாதிப்புகளை உருவாக்குகின்றன. பூமியி்ல் உள்ள வளிமண்டலமும் அதிலுள்ள வாயுக்களும் நம்மை இந்த மின்காந்த கதிர்வீச்சுக்களில் இருந்து பாதுகாத்து விடுகின்றன.

இல்லாவிட்டால் சூரியனின் பிளாஸ்மா அலைகள் தாக்குதலில் பூமி என்றைக்கோ பஸ்மாகியிருக்கும்.

இந் நிலையில் சூரியனின் வட பகுதியில் இன்னொரு மகா வெடிப்பு நடந்திருக்கிறது. சூரியனில் ஏற்பட்ட இந்த வெடிப்பின் அகலமே நமது பூமியின் அளவைவிட பெரியது என்கிறார்கள்.

பூமியை நோக்கிய திசையில் இந்த சூரிய வெடிப்பு ஏற்பட்டுள்ளதை பல தொலைநோக்கிகளும் பல செயற்கைக்கோள்களும் கடந்த ஜூலை 31ம் தேதி பதிவு செய்துள்ளன.

இதனால் கிளம்பிய கதிர்வீ்ச்சுக்களும் மின் காந்த அலைகளும் சூரியனில் இருந்து 93 மில்லியன் மைல்கள் வரை பரவியுள்ளன.

இதற்கு சோலார் சுனாமி என்று பெயர் சூட்டப்பட்டுள்ளது.

நமது காற்று மண்டலத்தின் உபயத்தால் இதனால் பூமிக்கு பெரிய அளவில் பாதி்ப்பு ஏதும் இருக்காது என்றாலும் சில செயற்கைக் கோள்களுக்கு பாதிப்பு ஏற்படலாம்.

அதே நேரத்தில் இன்று இரவு இந்த மின்காந்த கதி்ர்வீச்சுக்கள் பூமியை அடையும்போது அதன் துருவப் பகுதிகளில் (ஆர்க்டிக், அண்டார்டிகா பகுதிகள்) Auroa Borealis எனப்படும் மாபெரும் பல நிற வெளிச்சம் உருவாகும். வானில் பல ஆயிரம் கி.மீ. தூரத்துக்கு நீளும் இந்த வெளிச்சம், பூமியை மின் காந்த அலைகள் தாக்குவதின் எதிரொலி தான்.

மருத்துவக் காப்பீட்டுத் திட்டத்தின் குரூர முகபாவங்கள்

தமிழக அரசின் மருத்துவக் காப்பீட்டுத் திட்டம் களிப்பில் ஆழ்த்தியுள்ளதாக அறிக்கை வெளியிட்டிருக்கிறார் தமிழக முதல்வர். அத்திட்டம் தொடங்கப்பட்டு, ஓராண்டு நிறைவடைந்ததையொட்டி தன்னுடைய களிப்பை அவர் வெளியிட்டிருக்கிறார். அவருடைய அளவில் இந்தக் களிப்பு நியாயமானது.

ஏனெனில், தமிழகத்தை முன்னுதாரணமாகக் கொண்டு ஏனைய மாநில அரசுகளும் இத்தகைய காப்பீட்டுத் திட்டத்தைச் செயல்படுத்த வேண்டும் என்று மத்திய அரசு விரும்புகிறது. இதனால், பல மாநில அரசுகள் தமிழகத்தைப் பின்பற்றி இத்தகைய காப்பீட்டுத் திட்டத்தை தத்தமது மாநிலங்களில் அறிமுகப்படுத்தும் யோசனையில் இருக்கின்றன.

ஆனால், தமிழக முதல்வர் இப்படி ஓர் அறிக்கையை வெளியிட்டிருக்கும் இதே காலகட்டத்தில்தான் நாட்டின் தலைநகரத்திலிருந்து மருத்துவக் காப்பீட்டுத் திட்டத்தின் குரூர முகபாவங்கள் வெளிப்படத் தொடங்கியிருக்கின்றன.

இந்தியாவில் மருத்துவக் காப்பீட்டில் ஈடுபட்டுள்ள நிறுவனங்களில் 4 பொதுத்துறை நிறுவனங்கள் உள்ளிட்ட 18 பெரிய நிறுவனங்கள் பணமில்லாமல் சிகிச்சை அளிக்க வகை செய்யும் காப்பீட்டுத் திட்டங்களை (கேஷ் லெஸ் மெடி க்ளைம்) சில முக்கிய நகரங்களிலிருந்து விலக்கிக்கொண்டுள்ளன. அடுத்த சில வாரங்களில் நாட்டின் பல நகரங்களுக்கு இந்த நடவடிக்கை நீளலாம்.

தம்முடைய இந்த நடவடிக்கைக்கு, மருத்துவமனைகள் சிகிச்சைக்கு அநியாயக் கட்டணம் வசூலிப்பதாகவும் தங்களுக்கு கட்டுப்படியாகாததாலேயே இம்முடிவுக்கு வந்திருப்பதாகவும் காப்பீட்டு நிறுவனங்கள் தன்னிலை விளக்கம் அளித்துள்ளன. இந்திய மருத்துவக் காப்பீட்டு நிறுவனங்கள் கடந்த ஆண்டு தம் வாடிக்கையாளர்களிடமிருந்து "பிரீமிய'மாக வசூலித்த தொகையைக் காட்டிலும் இரண்டில் ஒரு பங்கு கூடுதலாக மருத்துவமனைகளுக்குச் செலுத்த வேண்டியிருந்ததாகக் காப்பீட்டுத் துறை வட்டாரங்கள் தெரிவிக்கின்றன.

இந்தப் பிரச்னையை மேலோட்டமாக அணுகுவோர் "பாவம், காப்பீட்டு நிறுவனங்கள்' என்று சொல்லலாம் (அரசுத் தரப்பும் இந்தியக் காப்பீட்டுத் துறையும் இப்போது அப்படித்தான் சொல்கின்றன). ஆனால், காப்பீட்டு நிறுவனங்கள் காலங்காலமாகக் கடைப்பிடித்துவரும் வியாபார உத்திகளில் ஒன்றுதான் இந்த நடவடிக்கை.

தமிழகத்தில் மருத்துவக் காப்பீட்டுத் திட்டம் எப்படிச் செயல்படுத்தப்படுகிறது? முதல்வர் அளித்திருக்கும் தகவலின்படி, இத்திட்டத்தின் கீழ் முதல் ஆண்டில் 1.53 லட்சம் நோயாளிகள் பயன் அடைந்திருக்கின்றனர்.

இதற்காக இந்தச் சிகிச்சைகளை மேற்கொண்ட மருத்துவமனைகளுக்கு அரசுடன் ஒப்பந்தமிட்டுள்ள காப்பீட்டு நிறுவனம் ரூ. 415.43 கோடி அளித்திருக்கிறது. ஆனால், இத்திட்டத்துக்காக சம்பந்தப்பட்ட காப்பீட்டு நிறுவனத்துக்கு அரசு முதல் ஆண்டில் செலுத்தியிருக்கும் "பிரீமியம்' ரூ. 628.20 கோடி. இந்த நிதியாண்டில் இத்திட்டத்துக்காக மேலும் ரூ. 750 கோடியை அரசு ஒதுக்கியிருக்கிறது.

இத்திட்டத்தால் உள்ளபடி யாருக்கு லாபம் என்பதை ஒரு பாமரனும் எளிமையாகச் சொல்லிவிடக்கூடும். ஆனால், மருத்துவக் காப்பீட்டு முறை ஏற்படுத்தும் மிகப் பெரிய இழப்பாக நாம் சுட்டிக்காட்டுவது லட்சக் கணக்கானோரின் உயிருடன் விளையாடிக்கொண்டிருக்கிறது என்பதேயாகும்.

ஜவுளிக் கடைகள் ஏதாவது ஒரு பெயரில் ஆண்டு முழுவதும் தள்ளுபடி அளிப்பதுபோல, எனக்குத் தெரிந்த ஒரு மருத்துவ நிபுணர், கடந்த ஓராண்டாக ஏதாவது ஒரு காரணத்தைச் சொல்லி "ஆலோசனைக் கட்டணம் முழுத் தள்ளுபடி' அளித்து நோயாளிகளைப் பார்க்கிறார்.

நோயாளிகளிடம் அவர் கேட்கும் முதல் கேள்வி: ""என்ன பிரச்னை?'' அடுத்த கேள்வி: ""காப்பீட்டு அட்டை இருக்கிறதல்லவா?'' ஒரு நோயாளியை அறுவைச் சிகிச்சைக்குத் தேர்ந்தெடுக்க இந்த இரு கேள்விகள் அவருக்குப் போதுமானதாக இருக்கிறது. இப்போது அவருடைய மருத்துவமனை ஒரு "நிரந்தர மருத்துவக் காப்பீட்டுத் திட்ட பயனாளிகளின் தேர்வு முகாம்' ஆகிவிட்டது.

இத்தகைய சூழலில், தமிழகத்தில் இத்திட்டத்தின் கீழ் கடந்த ஓராண்டில் அறுவைச் சிகிச்சை மேற்கொள்ளப்பட்ட லட்சத்துக்கும் மேற்பட்டோரில் உண்மையிலேயே எத்தனை பேருக்கு அறுவைச் சிகிச்சை அத்தியாவசியமாகத் தேவைப்பட்டிருக்கும் என்ற கேள்வி எழுகிறது.

ஏனெனில், மருத்துவர்களும் மருத்துவமனைகளும் மருத்துவக் காப்பீட்டு அட்டையை லாட்டரிச் சீட்டுபோல பார்க்கிறார்கள். ஒவ்வோர் அட்டையிலும் உள்ள தொகையை முதலில் உறிஞ்சப்போவது யார் என்று மருத்துவர்களிடையே ஒரு போட்டியே நடந்துகொண்டிருக்கிறது.

மருத்துவமனைகளுக்கும் காப்பீட்டு நிறுவனங்களுக்கும் இடையே உள்ள கள்ள உறவு இந்த ஆபத்தான போட்டியை ஊக்குவிக்கிறது. அரசு தன் பொறுப்புகளிலிருந்து விலகிக்கொள்வதற்காக இந்தப் போட்டியை அனுமதிக்கிறது.

தமிழகத்தின் முக்கியமான மருத்துவமனைகளில் ஒன்றான } காவிரிப் படுகை மாவட்ட மக்களின் மருத்துவ ஆதாரமான } தஞ்சாவூர் அரசு மருத்துவக் கல்லூரி மருத்துவமனை போன்ற ஒரு மருத்துவமனையை அமைக்க இன்றைக்கெல்லாம் ரூ. 135 கோடி போதுமானதாக இருக்கிறது. தஞ்சாவூர் மருத்துவக் கல்லூரி மருத்துவமனைக்கு ஒரு நாளில் சராசரியாக வந்து செல்லும் வெளிநோயாளிகளின் எண்ணிக்கை 400; அங்கு தங்கியிருக்கும் உள்நோயாளிகளின் எண்ணிக்கை 600. ஒவ்வொரு நாளும் அங்கு 15}20 பேருக்கு அறுவைச் சிகிச்சை மேற்கொள்ளப்படுகிறது. தமிழக அரசு மருத்துவக் காப்பீட்டுத் திட்டத்துக்கு இதுவரை ஒதுக்கியிருக்கும் இந்த ரூ. 1,378 கோடியில் தமிழகத்தில் 10 இடங்களில் தஞ்சாவூர் மருத்துவக் கல்லூரி மருத்துவமனை போன்ற மருத்துவமனைகளை உருவாக்கி இருக்கலாம். நம்முடைய மருத்துவக் கட்டமைப்பை அவை எப்படி பலப்படுத்தியிருக்கும் என்று நினைத்துப் பாருங்கள்!

இப்போதும்கூட மோசம் இல்லை. இன்னும் அரசின் கைகளில் வாய்ப்புகள் இருக்கின்றன. ஆனால், நம்முடைய அரசு தஞ்சாவூர் மருத்துவமனை போன்ற மருத்துவமனைகளை உருவாக்கப்போகிறதா? திருச்சி மருத்துவர் போன்ற மருத்துவர்களை ஊக்குவிக்கப்போகிறதா?

தண்டவாளங்களில் அடிக்கடி விரிசல் ஏற்படுவது ஏன்?

பழைய தண்டவாளங்களை மாற்றாமல் அப்படியே ரயில்களை இயக்குவதால் பல இடங்களில் அடிக்கடி விரிசல் ஏற்படுகிறது. இப்பிரச்னையில் தீவிர கவனம் செலுத்தி பழைய தண்டவாளங்களை மாற்ற ரயில்வே நிர்வாகம் நடவடிக்கை எடுக்க வேண்டும்.

இந்தியாவில் கடந்த 1853ம் ஆண்டு ஏப்., 16ம் தேதி ரயில் போக்குவரத்து துவக்கப்பட்டது. 150 ஆண்டுகள் பழமை வாய்ந்த இந்திய ரயில்வே துறை, உலகளவில் அதிக தொழிலாளர்கள் பணிபுரியும் நிறுவனங்களில் இரண்டாம் இடத்தில் உள்ளது.இந்திய ரயில்வேயில் தென்னக ரயில்வே, தென் மேற்கு ரயில்வே, சென்ட்ரல் ரயில்வே, கொங்கன் ரயில்வே என நான்கு பிரிவுகள் உள்ளன. தென்னக ரயில்வே கடந்த 1951ம் ஆண்டு ஏப்., 14ம் தேதி துவக்கப்பட்டது. இதில் 6,000 கி.மீ., தூரத்திற்கு ரயில் பாதை உள்ளது. இதில் 1,200 கி.மீ., தூரத்திற்கு மீட்டர் கேஜ் பாதையும், 4,800 கி.மீ., தூரத்திற்கு அகல ரயில் பாதையும் உள்ளது.அகல ரயில் பாதைக்கு பயன்படுத்தும் ஒரு தண்டவாளம் 13 மீட்டர் நீளம், 676 கிலோ எடை கொண்டது. சில இடங்களில் 13 மீட்டர் நீளம், 780 கிலோ எடையுள்ள தண்டவாளம் பயன்படுத்துகின்றனர். ஒரு கி.மீ., தூரத்திற்கு சராசரியாக 77 தண்டவாளம் பயன்படுத்துகின்றனர். மீட்டர் கேஜ் பாதைக்கு பயன்படும் தண்டவாளம் 12 மீட்டர் நீளமுள்ளது. தற்போது பல இடங்களில் அகல ரயில் பாதையாக மாற்றும் பணி நடந்து வருகிறது.

தண்டவாளம் விரிசலுக்கு காரணம்: மழை மற்றும் குளிர் காலங்களில் தண்டவாளத்தில் விரிசல் அதிகளவில் ஏற்படுகிறது. குளிர்ச்சி அதிகம் இருந்தால் தண்டவாளம் விரிவடைந்து விரிசல் ஏற்படும். ரயில்கள் அதிகம் இயக்குவதாலும் தண்டவாளம் தேய்ந்து விரிசல் ஏற்படும். பல இடங்களில் பழைய தண்டவாளங்களை பயன்படுத்துவதாலும் விரிசல் ஏற்படுகிறது.

இது குறித்து ரயில்வே அதிகாரி ஒருவர் கூறியதாவது:மழை மற்றும் குளிர் காலங்களில் மட்டுமே தண்டவாளங்களில் அதிகளவு விரிசல் ஏற்படும். சாதாரண நாட்களில் விரிசல் ஏற்பட வாய்ப்புகள் இல்லை. சிலீப்பர் கட்டைகளால் விரிசல் ஏற்பட வாய்ப்புகள் இல்லை. தண்டவாளத்தின் மீது ஓடும் ரயில்களை பொருத்தே அதன் உறுதித் தன்மை மாறுபடும்.அதிக ரயில்கள் இயக்கும் போது தண்டவாளத்தின் தேய்மானம் அதிகமாகும். சராசரியாக ஏழு முதல் 10 ஆண்டுகள் வரை தண்டவாளம் எந்த பிரச்னையுமின்றி நன்றாக இருக்கும். அதன் பிறகு விரிசல் ஏற்பட வாய்ப்புகள் உள்ளன. குறிப்பிட்ட தண்டவாளத்தின் மீது 20 ஜி.எம்.டி., (கிராஸ் மில்லியன் டன்) அளவிற்கு ரயில் போக்குவரத்து நடந்து தண்டவாளத்தை மாற்றாமல் இருந்தாலும் விரிசல் ஏற்பட வாய்ப்புகள் உள்ளன. இந்த 20 ஜி.எம்.டி.,யை கடக்க சில இடங்களில் 15 ஆண்டுகள் வரை ஆகும்.இவ்வாறு அவர் கூறினார்.சென்னை - திருச்சி மார்க்கத்தில் தினமும் 20க்கும் மேற்பட்ட ரயில்கள் சென்று வருகின்றன. இதை கணக்கிட்டால் 20 ஜி.எம்.டி.,யை விட அதிகமாக ரயில் போக்குவரத்து நடந்திருக்கும். சென்னை - திருச்சி மார்க்கத்தில் 1997ம் ஆண்டு முதல் அகல ரயில் பாதையில் ரயில்கள் இயக்கப்படுகின்றன. கடந்த 13 ஆண்டுகளாக ரயில்கள் செல்வதால் பல இடங்களில் தண்டவாளத்தின் தன்மை மாறியிருக்கும். இந்த மார்க்கத்தில் விரிசல்கள் ஏற்பட்ட பல இடங்களிலும் பழைய தண்டவாளமே இருக்கிறது.

புதிய தண்டவாளங்கள் மாற்றும் பணி நடந்து பல ஆண்டுகள் ஆகின்றன.தண்டவாளம் பராமரிப்பு பணியில் ரயில்வே ஊழியர்களின் பங்கும் முக்கியமானது. தண்டவாளங்களில் விரிசல்களை கண்காணிக்கும் பணி ரயில்வே ஸ்டேஷன்களில் பணிபுரியும் கீமேன் என்பவரைச் சேரும். இவருக்கு கீழ் எட்டு டிராக்மேன்கள் இருப்பர். இக்குழுவினருக்கு கீமேன் பணி ஒதுக்கீடு செய்து கண்காணிக்க வேண்டும்.இக்குழுவினர் ஒரு ரயில் நிலையத்திலிருந்து 6 கி.மீ., தூரத்திற்கு எல்லை வரையறை செய்து, தண்டவாள பாதை வழியாக ரயில்கள் வருவதற்கு சில மணி நேரங்களுக்கு முன் நடந்து சென்று தண்டவாளத்தின் தன்மையை கண்காணிக்க வேண்டும்.

ஆனால் இவர்களுக்கு பனிக்காலங்களில் தான் இரவு நேரங்களில் "டிராக்' கண்காணிப்பு பணி வழங்கப்படுகிறது. அதிக மழை பெய்யும் நாட்களிலும் கண்காணிப்பு பணி இருக்கும். மற்ற நாட்களில் எங்காவது தண்டவாள விரிசல் ஏற்பட்டால் மட்டுமே பணி இருக்கும். ரயில்வே துறையின் ஆட்குறைப்பு நடவடிக்கையால் பல இடங்களில் டிராக் மேன் பணிக்கு ஆட்களே இல்லை.தண்டவாளம் கண்காணிப்பு பணியை அனைத்து நாட்களிலும் செய்தால் இப்பிரச்னை ஏற்பட வாய்ப்பில்லை. தண்டவாளத்தின் தன்மையை அதிகாரிகள் தலைமையில் அடிக்கடி ஆய்வு செய்து பழைய தண்டவாளங்களை உடனுக்குடன் மாற்ற நடவடிக்கை எடுக்க வேண்டும். இவ்வாறு செய்தால் தண்டவாள விரிசல் ஏற்படுவது தவிர்க்கப்படும்.

சூப்பர் டீலக்ஸ் பஸ்கள் அல்ட்ரா டீலக்சாக மாற்றம்

தமிழகத்தில் பெட்ரோல், டீசல் விலை உயர்வையடுத்து டயர், டியூப் உள்ளிட்ட அனைத்து உதிரி பாகங்களின் விலையும் கடுமையாக உயர்ந்துள்ளன. இதனால் ஏற்பட்டுள்ள இழப்பை சரிகட்டும் வகையில், விரைவு போக்குவரத்துக் கழகத்தில் உள்ள சூப்பர் டீலக்ஸ் பஸ்கள் அனைத்தையும் அல்ட்ரா டீலக்ஸ் பஸ்களாக மாற்ற முடிவு செய்யப்பட்டுள்ளது.

தமிழக அரசு விரைவு போக்குவரத்துக் கழகத்தின் மூலம் நீண்ட தூர பஸ்கள் இயக்கப்பட்டு வருகின்றன. குறிப்பாக, சென்னையில் இருந்து தென் மாவட்டங்களுக்கும், தென் மாவட்டங்களில் இருந்து சென்னை, கோவை, ஈரோடு, திருப்பூர், சேலம், பெங்களூரு ஆகிய தொழில் நகரங்களுக்கு அதிக அளவில் பஸ்கள் இயக்கப்பட்டு வருகின்றன.பெங்களூரில் இருந்து சேலம் வழியாக மதுரை, திருநெல்வேலி, தூத்துக்குடி, திருச்செந்தூர், உடன்குடி, திசையன்விளை, நாகர்கோவில், திருவனந்தபுரம், கன்னியாகுமரி, ராமேஸ்வரம், தேனி, கம்பம் ஆகிய பகுதிகளுக்கு அதிக அளவில் பஸ்கள் இயக்கப்படுகின்றன.அரசு விரைவு போக்குவரத்துக் கழகம் மூலம் இயக்கப்படும் பஸ்களில், 75 சதவீத பஸ்கள் அல்ட்ரா டீலக்ஸ் பஸ்களாக மாற்றப்பட்டு விட்டன. மேலும் 5 சதவீத பஸ்கள், "ஏசி' வசதி பஸ்களாக மாற்றப்பட்டுள்ளன. மீதமுள்ள 18 சதவீதம்சூப்பர் டீலக்ஸ் பஸ்களில் 2 சதவீதம் மட்டுமே சாய்வு சீட் இல்லாத சாதாரண பஸ்களாக இயக்கப்பட்டு வருகின்றன.

கடந்த மாதம் மத்திய அரசு பெட்ரோல், டீசல் விலையை உயர்த்தியது. அதன் காரணமாக, பஸ்களுக்கு பயன்படுத்தப்படும் டீசலுக்கான செலவு அதிகரித்ததோடு, கச்சா ஆயிலை மூலப்பொருளாகக் கொண்டு தயார் செய்யப்படும் அனைத்து உதிரி பாகங்களின் விலை 20 சதவீதம் அதிகரித்துள்ளது.போக்குவரத்துக் கழகங்களுக்கு கூடுதல் செலவு ஏற்பட்டுள்ள நிலையில், தேர்தலை மனதில் கொண்டு பஸ் கட்டணத்தை உயர்த்தப்போவது இல்லை என, தமிழக அரசு அறிவித்துள்ளது. இதனால், போக்குவரத்துக் கழகங்கள் இழப்பை சரி செய்ய, மறைமுக யுக்திகளை கையாளத் துவங்கியுள்ளன.

முதற்கட்டமாக, விரைவு போக்குவரத்துக் கழகங்களின் சார்பில் இயக்கப்படும் சாய்வு சீட்டுகளைக் கொண்ட சூப்பர் டீலக்ஸ் பஸ்களை, அல்ட்ரா டீலக்ஸ் பஸ்களாக மாற்ற முடிவு செய்யப்பட்டுள்ளது. அதன் மூலம் சீட்டு ஒன்றுக்கு குறைந்த பட்சம் 25 முதல் அதிகபட்சம் 75 ரூபாய் வரை கூடுதல் கட்டணமாக வசூலிக்க முடியும்.விரைவு போக்குவரத்துக் கழகத்துக்கு பல கோடி ரூபாய் கூடுதல் வருவாய் கிடைக்க வாய்ப்பு உள்ளதால், இத்திட்டத்தை செயல்படுத்த அதிகாரிகள் நடவடிக்கை மேற்கொண்டுள்ளனர்.

அதிகாரிகளின் இந்த முடிவின்படி சேலத்தில் இருந்து மதுரை வழியாக இயக்கப்படும் சேலம் - திருநெல்வேலி(628வி), சேலம் - திருச்செந்தூர்(637), சேலம் - ராமேஸ்வரம்(633), சேலம் - சென்னை (விழுப்புரம், தாம்பரம் வழி), சேலம் - சென்னை (திருவண்ணாமலை, திண்டிவனம் வழி), ஈரோடு - திருநெல்வேலி, கோவை- திருநெல்வேலி, திருப்பூர் - திருநெல்வேலி என இயக்கப்படும் சூப்பர் டீலக்ஸ் பஸ்கள்என, தமிழகம் முழுவதும் 125 சூப்பர் டீலக்ஸ் பஸ்களை அல்ட்ரா டீலக்ஸ் பஸ்களாக மாற்ற போக்குவரத்துக் கழகம் முடிவு செய்துள்ளது.அதற்கான அறிவிப்புகளை வெளியிடாமல் சத்தமின்றி பஸ்களின் கட்டமைப்பில் சிறு மாற்றம் செய்து, டிக்கெட் கட்டணத்தை அதிகரிக்க விரைவு போக்குவரத்துக் கழக அதிகாரிகள் முடிவு செய்து, அமைச்சரின் ஒப்புதலையும் பெற்றுள்ளனர். விரைவில் அரசு விரைவு பஸ்கள் அனைத்தும் அல்ட்ரா டீலக்ஸ் பஸ்களாக மட்டுமே இருக்கும்.

அமைச்சர் என்ன சொல்கிறார்?இது பற்றி போக்குவரத்துத் துறை அமைச்சர் நேரு கூறுகையில், ""அரசு விரைவு போக்குவரத்துக் கழகத்தில் தற்போது இயக்கப்பட்டு வரும் பஸ்களை, "அல்ட்ரா டீலக்சாக' மாற்றுவது போன்ற திட்டம் ஏதுமில்லை. இந்த ஆட்சியில் விரைவு போக்குவரத்துக் கழகத்துக்கு இதுவரை 500 பஸ்கள் புதிதாக வாங்கப்பட்டுள்ளன. இந்தாண்டில் மேலும் 100 பஸ்கள் வாங்கப்பட்டுள்ளன.""இந்த பஸ்கள் சாதாரண கட்டண விகிதம் ஒரு கி.மீ.,க்கு 32 காசு என்ற அடிப்படையிலேயே இயக்கப்படுகின்றன. "அல்ட்ரா டீலக்ஸ்' பஸ்சில் கி.மீ.,க்கு52 காசு வசூலிக்கப்படுகிறது. இவற்றில், கூடுதல் கட்டணம் வசூலிக்கக் கூடாதென முதல்வர் உத்தரவிட்டுள்ளதால், பழைய கட்டணத்தில் தான் இயக்குகிறோம்,'' என்றார்