பெண்கள் சாதனை படைக்க இன்னும் போக வேண்டியது வெகு தூரம்...!

எல்லாத் துறைகளிலும் பெண்கள் சாதனை படைக்கும் காலம் இது. குடியரசுத் தலைவர், மக்களவைத் தலைவர், உச்ச நீதிமன்ற நீதிபதி, மாபெரும் கட்சித் தலைவர் என்று இன்று பெண்கள் புகுந்து புறப்படாத துறைகளே இல்லை எனலாம். கனவில் மட்டுமே சாத்தியப்பட்டு வந்த விண்வெளிப் பயணமும் மகளிருக்கு சாத்தியமாகியிருக்கிறது.

இந்தியப் பெண்கள், அயல்நாட்டு நிறுவனங்களில் உயர் பதவி வகிக்கிறார்கள். நிர்வாகத் துறையில் வெற்றிக்கொடி நாட்டுகிறார்கள். கேட்பதற்கும், பார்ப்பதற்கும், படிப்பதற்கும் மகிழ்ச்சியாக இருக்கிறது. ஆனால் உண்மையில் பெண்களின் நிலை உயர்ந்திருக்கிறதா? படித்த, நகர்ப்புறப் பெண்களே தங்களை நிலைநிறுத்திக் கொள்ள கடுமையாகப் போராட வேண்டிய நிலையில், படிப்பறிவற்ற கிராமப்புறப் பெண்களைப் பற்றிக் கேட்கவே வேண்டாம். வரதட்சிணைக் கொடுமை, வன்கொடுமை, பாலியல் ரீதியிலான தொல்லைகள் என்று பெண்களுக்கு எதிரான கொடுமைகள் இன்னும் குறைந்தபாடில்லை.

இந்தியப் பெண்களில் 66.6 சதவீதம் பேர் குடும்ப வன்முறைக்கு இலக்காவதாகப் புள்ளிவிவரங்கள் தெரிவிக்கின்றன. ஆண்டுக்கு சுமார் 5,000 பெண்கள் வரதட்சிணை கொடுமையால் உயிரிழக்கிறார்கள். இதில் சராசரியாக 12 பேர் சமையலறையில் தீப்பிடித்து இறப்பதாக அதாவது ஸ்டவ் வெடித்து இறப்பதாகக் கூறப்படுகிறது. யுனிசெப் அமைப்பு சார்பில் வெளியிடப்பட்ட 2009-ம் ஆண்டுக்கான உலக குழந்தைகள் நிலை பற்றிய அறிக்கைப்படி, 20 முதல் 24 வயதுள்ள திருமணமான இந்தியப் பெண்களில் 47 சதவீதத்தினர், சட்டப்படியான திருமண வயதான 18 வயது நிரம்புவதற்கு முன்பே திருமணம் செய்துகொண்டவர்கள். இதில் 56 சதவீதத்தினர் கிராமப் பகுதியைச் சேர்ந்தவர்கள்.

சர்வதேச அளவில் 40 சதவீதம் அளவுக்குக் குழந்தைத் திருமணங்கள் இந்தியாவில் நடக்கின்றன (சேலத்தில் கடந்த வாரம் 13 வயது சிறுமி ஒருவருக்கு நடந்த திருமணமே இதற்கு உதாரணம்!). அதேபோல உயர்கல்வி பயிலும் பெண்களின் எண்ணிக்கையைவிட ஆண்களின் எண்ணிக்கை அதிகம். கிராமப்புறங்களில் கல்வி கற்பவர்களில், பெண்களைவிட ஆண்களின் எண்ணிக்கை அதிகம். இதற்கு இந்திய கிராமங்களில் பெண்களுக்கென பிரத்தியேக கழிப்பறை இல்லாததும், பெண் ஆசிரியைகள் போதிய எண்ணிக்கையில் இல்லாததும் ஒரு காரணமாகக் குறிப்பிடப்பட்டுள்ளது. இப்படி, அடிப்படை விஷயங்களிலேயே பெண்களுக்கு போதிய வாய்ப்புகள் கிடைக்காத நிலையே, நாடு சுதந்திரமடைந்து 62 ஆண்டுகளுக்குப் பிறகும் நீடிக்கிறது என்பது வருத்தத்துக்குரியது.

இந்நிலையில் படித்த பெண்கள், நகரத்தில் வசிக்கும் இளைஞிகள், நாகரிகம் என்ற பெயரில் கலாசாரச் சீரழிவுக்கு ஆளாகிறார்கள் என்ற குற்றச்சாட்டு சமீபகாலமாக நிலவி வருகிறது. உயர் பதவி வகிக்கும் பெண்களில் ஒரு சிலர் லஞ்சலாவண்யங்களில் சிக்கி பெயர் கெட்டு, மதிப்பிழந்து போன நிலையையும் ஊடகங்கள் வாயிலாக அறிகிறோம். அவையெல்லாம், வெள்ளாட்டு மந்தையில் ஒரு சில கருப்பாடுகள் என்று நமக்குநாமே சமாதானப்பட்டுக் கொள்வதில் அர்த்தமில்லை.தேவைக்கு அதிகமான ஆடம்பரமும், முறையில்லாத வழியில் பெறும் பொருளும் எந்த நாளும் நிலைத்ததில்லை.

தாங்கள் கற்ற கல்வியால் பெறும் சம்பாத்தியத்தைத் தவிர, முறையற்ற வழியில் கிடைக்கும் எந்த ஒரு வசதியையும், பொருளையும், பணத்தையும் நாடுவதில்லை என படித்த பெண்கள், குறிப்பாக உயர் பதவியில் இருக்கும் பெண்கள் தமக்குள் உறுதியெடுத்துக் கொள்ள வேண்டும். லட்சக்கணக்கில் பணம் செலவழித்துப் படித்து, மருத்துவர்களாகவும், பொறியியலாளர்களாகவும் பதவிக்கு வரும் பெண்கள், கேவலம் ஒரு சில ஆயிரங்களுக்காக லஞ்சலாவண்யப் புகார்களில் சிக்கி, மானம் கெட்டு, தலைகுனிவுக்கு உள்ளாகும் நிலை தேவையா என்பதை எண்ணிப் பார்க்க வேண்டும்.

ஆடம்பரத் தேவைகளைச் சுருக்கிக் கொண்டால், மற்றவர்களிடம் கையேந்த வேண்டிய நிலை இருக்காது. சினிமா, தொலைக்காட்சி நிகழ்ச்சிகளைப் பார்க்கும் இளம் பெண்கள், அதில் வரும் மாடல்களைப் போல மது அருந்துதல், சிகரெட் பிடித்தல் ஆண் நண்பர்களுடன் உல்லாசமாகச் சுற்றுதல், கல்லூரி, பள்ளி வகுப்புகளைக் "கட்' அடித்துவிட்டு மனம் போன போக்கில் திரிதல் போன்ற விரும்பத்தகாத செயல்களில் ஈடுபடுகிறார்கள். வாழ்க்கையில் ஒரு முறை மட்டுமே மலரும் இளமைப் பருவத்தை நல்ல விஷயங்களுக்குப் பயன்படுத்தும் விதத்தில் ஊடகங்கள் சமூகப் பொறுப்புணர்வுடன் நடந்து கொள்ள வேண்டும். "தீதும் நன்றும் பிறர் தர வாரா' என்பதற்கேற்ப, தம் வாழ்க்கையை சிறந்த முறையில், நல்ல முறையில் அமைத்துக் கொள்வது இளைய சமுதாயத்தினரின் கையில்தான் உள்ளது.

இதற்கு பெற்றோரும், ஆசிரியர்களும் அவ ர்களைத் தொடர்ந்து கண்காணித்து அறிவுரை கூறுவதும், அவர்கள் சரியான பாதையில் செல்ல வழிகாட்டுவதும் அவசியம். காலங்காலமாகத் தொடரும் பெண்களுக்கெதிரான வரதட்சிணை கொடுமைகளுக்கு இனியும் முற்றுப்புள்ளி வைக்காமல் இருப்பது, நம்மை நாமே குழி தோண்டிப் புதைத்துக் கொள்வதற்கு ஒப்பாகும். வரதட்சிணை கேட்கும் வரனுக்கு வாழ்க்கைப்பட மாட்டேன் என்று உறுதியாக முடிவெடுக்கும் நிலைக்கு பெண்கள் உயர வேண்டும். "என் மகளுக்கு வரதட்சிணை கொடுத்துத்தான் திருமணம் செய்ய வேண்டிய நிலை வரும் என்றால், அவளுக்குத் திருமணமே தேவையில்லை' என்று கண்டிப்புடன் முடிவெடுக்கும் துணிவு ஒவ்வொரு பெற்றோருக்கும் வரவேண்டும்.

அப்படிப்பட்ட உறுதியான முடிவெடுக்காத வரையில், எத்தனை காலமானாலும் நம் நாட்டைவிட்டு வரதட்சிணைப் பேயை விரட்டவே முடியாது. படித்த பெண்கள், கிராமப்புற மகளிரின் கல்விக் கண் திறக்க முழு முயற்சி எடுக்க வேண்டும். "கற்றதனாலாய பயன்' மற்றவர்களின் நிலையை உயர்த்துவதே என்பதை மகளிர் உணர வேண்டும். நாடாளுமன்றத்தில் மகளிருக்கென 33 சதவீத இடஒதுக்கீடு மசோதா நிறைவேற்றுவதுடன் பணி முடிந்துவிட்டதென அரசியல் கட்சிகள் கருதக்கூடாது. உண்மையில், சர்வதேச அளவில் நாடாளுமன்றங்களில் பெண் உறுப்பினர்கள் 18 சதவீதத்தினரே. இதில் நம் நாட்டில் 33 சதவீத இடஒதுக்கீடு கிடைத்தால் அது மிகவும் வரவேற்கத்தக்கதாகத்தான் இருக்கும். கடைக்கோடி கிராமப் பெண்களுக்கும் ஆட்சியில் சம உரிமை கிடைக்க வழிவகை செய்ய வேண்டும். அதற்கு நீண்ட நாள்கள் ஆகலாம். ஆனாலும் பொறுமையோடு காத்திருப்போம்.

இனி பருப்பு வேகுமா? "இனி எங்​கள் முதல் வேலை "

க​டந்த சில தினங்​க​ளாக எந்த இந்​திய நாளி​தழ்​க​ளைப் புரட்​டி​னா​லும் அரிசி,​​ பருப்பு,​​ கோதுமை போன்ற உண​வுப் பொருள்​க​ளின் விலை ஏற்​றம் பற்​றிய செய்​தி​கள் முக்​கி​யத்​து​வம் பெற்​றுள்​ளது.​ குறிப்​பா​கப் பருப்பு விலை ஏற்​றம் பயங்​க​ர​மா​யுள்​ளது.​

​ கிலோ ரூ.​ 80 கொடுத்து வாங்​கிய பருப்பு வேக​வும் இல்லை.​ கிலோ ரூ.​ 100 விலை​யுள்ள பருப்பு வேக​லாம்.​ வேகாத அன்​னி​யப் பருப்​பு​க​ளுக்கு அநி​யாய விலை வழங்க வேண்​டி​யுள்​ளது.​ உயர்ந்து செல்​லும் உணவு விலை​கள் நடுத்​தர மக்​களை வாட்டி எடுப்​ப​தால் இப்​போது அமைச்​சர்​கள் ஒரு​வ​ருக்​கொ​ரு​வர் ""உன்​னால்​தான்'' ""உன்​னால்​தான்'' என்று ஒரு​பக்​கம் பொறுப்​பைத் தட்​டிக் கழிப்​ப​து​டன் கூடவே,​​ ""இனி எங்​கள் முதல் வேலை ""உணவு ​ விலை​க​ளைக் கட்​டுப்​ப​டுத்​து​வ​து​தான்'' என்று சூளுரை வேறு...​ இன்றா,​​ நேற்றா.​ உணவு விலை ஏற்​றம் கடந்த ஆண்டே நிகழ்ந்​து​விட்​டது.​ எதுவோ நேற்​று​தான் விலை உயர்ந்​த​து​போல் இவர்​கள் பேசு​கி​றார்​கள்.​

வி​லை​வா​சி​யைக் கட்​டுப்​ப​டுத்த பட்​ஜெட்​டில் பணம் ஒதுக்​கு​வ​தா​க​வும் பேச்​சுள்​ளது.​ பருப்பு ஏற்​று​மதி செய்​யும் பல நாடு​க​ளில் இந்​தி​யக் கதை உள்​ளது.​ தவி​ர​வும்,​​ ஏற்​று​மதி செய்​த​வர்​க​ளுக்​குப் பழைய பாக்கி இன்​னம் தர​வில்​லை​யாமே.​ உண​வுப் பற்​றாக்​குறை உல​க​ளா​வி​ய​தா​யுள்​ளது.​ ஏற்​று​மதி நாடு​க​ளி​லும் பருப்​புக்​குப் பற்​றாக்​குறை.​ சும்மா பருப்பு வெந்​து​வி​டாது.​ எப்​போது பருப்பு வரும்?​

கைக்​கு​ழந்​தைக்கு சாதம்​போட்​டுப் பருப்​புப்​போட்டு நெய்​போட்டு மணக்க மணக்​கப் பிசைந்து ஊட்ட முடி​யாத தாய்​மார்​க​ளின் கவலை விவ​சாய அமைச்​ச​ருக்கு எட்​டுமா?​ எட்​டவே எட்​டாது.​ ஏனெ​னில் பருப்​பைக் காணோம்,​​ அரி​சி​யைக் காணோம் என்​றால் மதிப்​புக்​கு​ரிய விவ​சாய அமைச்​சர் வீர​பாண்​டி​யா​ரும்,​​ கிரிக்​கெட் அமைச்​ச​ரும் மத்​திய விவ​சாய அமைச்​ச​ரு​மான சரத்​ப​வா​ரும் பி.ட்டி கத்​த​ரிக்​காய்​களை மான்​சண்டோ -​ மஹைக்கோ நிறு​வ​னங்​க​ளி​ட​மி​ருந்து வாங்கி வழங்​கு​வ​தாக உறுதி அளித்​துள்​ளார்​கள்.​ அமைச்​சர்​க​ளின் கவலை வள​ரும் குழந்​தை​க​ளுக்​குப் பருப்பு சாதம் வழங்​கு​வ​தாக இல்லை.​ மாறாக யு.எஸ்.​ நிதி உதவி உயி​ரித் தொழில்​நுட்​பம் பாக்​கேஜ்-​2லிருந்து துரோகி விஞ்​ஞா​னி​க​ளுக்கு வரும் பாக்​கே​ஜு​க​ளைக் கூறு​போட்​டால் எவ்​வ​ளவு தேறும் என்​ப​தில் ஆர்​வம் உள்​ளது.​ பருப்பு ஒரு கேடா?​ பி.ட்டி.​ வெண்​டைக்​காய்,​​ பி.ட்டி முட்​டைக்​கோஸ்,​​ பி.ட்டி மக்​காச்​சோ​ளம் என்று எவ்​வ​ளவு அயிட்​டங்​கள் உள்​ளன.​ பருப்பு நில​மெல்​லாம் பி.ட்டி பருத்தி நில​மா​னது.​ இன்று பருப்பு அபேஸ்.​ பி.ட்டி மக்​காச்​சோ​ளம் பி.ட்டி வெண்டை வந்து இனி கோதுமை நிலம் அபே​ஸô​கும்.​

உ​ல​கி​லேயே புரத உண​வைப் பருப்பு வடி​வில் சைவ​மாக உண்​ப​வர்​க​ளின் எண்​ணிக்கை இந்​தி​யா​வில் மட்​டுமே உண்டு.​ இதர நாடு​க​ளில் இறைச்சி உணவு.​ ஆகவே,​​ இந்​தி​யா​வில்​தான் பருப்பு உற்​பத்​தி​யும் அதி​கம்.​ பருப்பு நுகர்​வும் அதி​கம்.​ பருப்பு இறக்​கு​ம​தி​யும் அதி​கம்.​ ஆகவே இந்​திய விலையை வைத்​துத்​தான் ஏற்​று​மதி நாடு​க​ளின் விலை​க​ளும் ஏறு​கின்​றன.​ கடந்த 50 ஆண்​டு​க​ளா​கப் பருப்பு உற்​பத்​தி​யும் பருத்தி சாகு​ப​டி​யும் படிப்​ப​டி​யா​கக் குறைந்​து​விட்​டது.​ படிப்​ப​டி​யா​கப் பருப்பு இறக்​கு​மதி உயர்ந்​து​விட்​டது.​

​ இன்று அனைத்​து​ல​கச் சந்​தை​யில் இவ்​வ​ளவு விலை உயர்ந்​தா​லும் இந்​தி​யா​வி​லும் பருப்பு விலை ஆகா​சத்​தைத் தொட்​டா​லும்​கூட விவ​சா​யி​கள் பருப்பு சாகு​படி செய்ய முன்​வ​ரு​வது இல்லை.​ ஏனெ​னில் இந்​தி​யா​வில் பருப்பு சாகு​படி செய்​வதா பி.ட்டி பருப்பு உற்​பத்தி செய்​வதா என்​பதை அமெ​ரிக்​கத் தொழில்​நுட்ப உத​வித்​திட்​டம் நிர்​ண​யிக்​கி​றது.​ ஆகவே,​​ இந்​திய மாநில அர​சு​கள் பருப்பு உற்​பத்​தி​யா​ளர்​க​ளுக்கு எந்​தச் சிறப்பு உத​வியோ,​​ கொள்​மு​தலோ,​​ ஊக்​க​வி​லை​களோ வழங்க முன்​வ​ரு​வது இல்லை.​ நாளைய வர​லா​றில் இந்​தி​யா​வில் பருப்பு சாகு​படி இருந்​ததா என்ற சந்​தே​கம் வந்​து​வி​டக் கூடாது என்று கருதி,​​ நாம் சில விவ​ரங்​க​ளைப் பதிவு செய்து கொள்​வது நல்​லது.​

1985-86-ம் ஆண்டு வரை இந்​தி​யா​வில் சரா​ச​ரி​யாக 2.3 கோடி ஹெக்​டே​ரில் பருப்பு விளை​விக்​கப்​பட்டு,​​ உற்​பத்தி 1.3 கோடி டன்​கள் விளைந்த நிலை குறைந்து இன்று 1.90 கோடி ஹெக்​டே​ரில் பருப்பு சாகு​படி செய்​யப்​பட்டு உற்​பத்தி 90 லட்​சம் டன்​க​ளா​கக் குறைந்​து​விட்​டது.​ பருப்பு அதி​க​பட்​சம் மானா​வா​ரி​யா​க​வும்,​​ கலப்​புப்​ப​யிர்​க​ளில் ஒன்​றா​க​வும் பயி​ரா​கி​றது.​ 1994-ல் 5 லட்​சம் டன்​கள் பருப்பு இறக்​கு​மதி படிப்​ப​டி​யாக உயர்ந்து இன்று 2009 வரை பருப்பு இறக்​கு​மதி ஆண்​டுக்கு 30 லட்​சம் டன்​க​ளாக உயர்ந்​து​விட்​டது.​ இதில் சோகம் எது​வெ​னில் நாட்​டில் பருப்பு உற்​பத்​தியை உயர்த்த பருப்பு சாகு​ப​டிக்கு இல​வச சொட்டு நீர்ப்​பா​ச​னம்-​தெளிப்​புப் பாசன வச​திக்கு முயற்சி என்று உருப்​ப​டி​யாக நட​வ​டிக்கை எடுக்​கா​மல் ஆண்​டுக்கு ஆண்டு எவ்​வ​ளவு பருப்பு இறக்​கு​மதி செய்​ய​லாம் என்​ப​தற்கு எக்ஸ்​பர்ட் கமிட்டி செயல்​ப​டு​கி​றது.​ இந்​தி​யா​வின் பருப்​புக்​கொள்கை கற்​ப​னைக்கு எட்​டாத மட​மை​யில் செயல்​ப​டு​வது நிரூ​ப​ணம்.​

இந்​தி​யா​வில் எவ்​வ​ளவு பருப்​பு​கள் வகை​வ​கை​யாக உள்​ளன?​ மொத்த உற்​பத்​தி​யில் 40 சதம் பங்கு கொண்​டைக்​க​டலை வழங்​கு​கி​றது.​ ஏறத்​தாழ 40 லட்​சம் டன்​கள் கொண்​டைக்​க​ட​லை​களை சுண்​டல் வடி​வ​மாக உண்​பது உடம்​புக்கு ஆரோக்​கி​யம்.​ ஆனால் கடலை மாவாக மாற்​றப்​பட்டு பஜ்ஜி,​​ பகோடா,​​ மைசூர்​பாகு என்று உண்​ப​தும் நொறுக்​குத் தீனி​யாக மிக்​சர்,​​ ஓமப்​பொடி,​​ முறுக்கு என்று கொரிப்​ப​தும் விரும்​பத்​தக்​க​தல்ல.​ குறிப்​பாக உடல் பரு​ம​னாக உள்​ள​வர்​கள் தவிர்க்​க​லாம்.​ கொண்​டைக்​க​ட​லை​யில் கரிய பழுப்பு,​​ சந்​நி​யாசி,​​ வெளிர்​மஞ்​சள்,​​ கருப்பு,​​ குலாபி எல்​லாம் சிறப்​பா​னவை.​ இந்​தி​யா​வில் விளை​யக்​கூ​டிய கொண்​டைக்​க​டலை வேறு நாடு​க​ளில் கிடை​யாது.​ இறக்​கு​ம​தி​யா​வது வெள்​ளைக்​க​டலை மட்​டுமே.​ இதற்கு காபூ​லி​செனா என்​றும் பெயர்.​ இது ஆப்​கா​னிஸ்​தான்,​​ ஆஸ்​தி​ரே​லியா போன்ற நாடு​களி​லி​ருந்து இறக்​கு​ம​தி​யா​கி​றது.​ வெள்​ளைக்​க​ட​லை​யில் உப்​புக்​க​ட​லையோ பொட்​டுக்​க​ட​லையோ தயா​ரிக்க முடி​யாது.​

இ​ரண்​டா​வ​தாக,​​ துவரை,​​ மொத்​தப்​ப​ருப்பு உற்​பத்​தி​யில் இதன் பங்கு 20 சதம்.​ அதா​வது ஏறத்​தாழ 20 லட்​சம் டன்​கள்.​ நமது பற்​றாக்​கு​றையை மியான்​மர் மட்​டுமே இட்டு நிரப்​பு​கி​றது.​ நைஜீ​ரி​யாவி​லி​ருந்​தும் வரு​கி​றது.​ உள்​ளூ​ரில் நாம் விளை​விக்​கும் பருப்​பை​விட இறக்​கு​ம​திப் பரப்பு தர​மா​னது இல்லை.​ துவ​ரை​யின் தோலி நிறத்தை வைத்து வெள்ளை,​​ சிவப்பு,​​ கருப்பு,​​ பழுப்பு,​​ மொசைக் என்று ஆறு ரகங்​களை வேற்​று​மைப்​ப​டுத்​த​லாம்.​ இவற்​றில் வெள்ளை நிற​மும்,​​ மொசைக் நிறத் துவ​ரை​யும் தரம் மிகுந்​தவை.​ பெரி​தா​க​வும்,​​ நன்கு வேகக்​கூ​டி​ய​தா​க​வும் இருக்​கும்.​ சிவப்​பும் அவ்​வாறே.​ துவ​ரை​யின் பெயரே ஆங்​கி​லத்​தி​லும்,​​ ஹிந்​தி​யி​லும் சிவப்​புப் பருப்பு.​ அர்​ஹர் என்​றா​லும் சிவப்பு.​ மொசைக் என்​பது மரத்​து​வரை.​ இது கொங்கு நாட்​டின் சிறப்பு ரகம்.​ பெரன்​னி​யல் 10 ஆண்​டு​கள் பலன் தரும்.​ பல்​லு​யிர் வேளாண்​மைக்கு ஏற்ற ரகம்.​ நிறம் ஊதா​வில் பழுப்​புத்​திட்​டு​கள் பதித்து டிசை​னாக இருக்​கும்.​ இதே கொங்கு நாட்​டில்​தான் தமிழ்​நாடு வேளாண் பல்​க​லைக்​க​ழ​கம் உள்​ளது.​ இப்​ப​டிப்​பட்ட அரிய துவரை ரகத்தை விரி​வாக்​கம் செய்​யா​மல் அமெ​ரிக்க ஆலோ​ச​னை​யை​யும்,​​ மான்​சென்டோ ஆலோ​ச​னை​யை​யும் கேட்டு பி.ட்டி,​​ பி.ட்டி என்று புலம்​பும் கொடு​மையை என்​னென்​பது!​

உ​ளுந்து மூன்​றா​வது முக்​கிய பருப்பு வகை.​ மொத்​தப் பருப்பு உற்​பத்​தி​யில் உளுந்து 4 சதம் மட்​டுமே.​ மொத்த உளுந்து உற்​பத்தி சரா​ச​ரி​யாக 12 லட்​சம் டன் முதல் 15 லட்​சம் ​ டன்​கள்.​ இதில் சாம்​பல்,​​ கருப்பு,​​ கரும்​பச்சை,​​ பெரு​வெட்டு,​​ சிறுசு என்ற ரக வேற்​று​மை​கள் உள்​ளன.​ இவை​த​விர,​​ ஏரா​ள​மான ரகங்​களை ஒரு​கா​லத்​தில் தமிழ்​நாடு வேளாண் பல்​க​லைக்​க​ழ​கம் வெளி​யிட்​டுள்​ளது.​

பா​சிப்​ப​யறு அல்​லது பச்​சைப்​ப​ருப்பு நான்​கா​வது இடத்​தில் உள்​ளது.​ இது சுமார் 10 லட்​சம் டன்​கள் உற்​பத்​தி​யா​கி​றது.​ மொத்த உற்​பத்​தி​யில் இதன் பங்கு 4 சதம்.​

உ​ளுந்​தும் பய​றும் இந்​தி​யச் சிறப்​பு​கள்.​ சீனா​வி​லும் உண்டு.​ ஏற்​று​மதி செய்​யும் அள​வில் எந்த நாட்​டி​லும் சரக்​கு​கள் இல்லை.​

இந்த நான்கு முக்​கிய பருப்​பு​க​ளைத் தவிர தட்​டாம்​ப​யறு என்ற காரா​மணி தென்​மா​நி​லங்​க​ளில் மட்​டுமே விளை​கின்​றன.​ மலைப்​பி​ர​தே​சங்​க​ளில் "ராஜ்மா' என்ற காரா​மணி விலை​ம​திப்​புள்ள பருப்​பு​க​ளில் ஒன்று.​ நம்ம ஊர்ச் சிவப்​புக் காரா​ம​ணி​யின் பெரிய உரு​வமே ""ராஜ்மா''.​ இவற்​றைத்​த​விர,​​ மசூர்,​​ நரிப்​ப​யறு,​​ பட்​டாணி,​​ கேச​ரிப்​ப​ருப்பு ஆகி​யவை குறைந்த முக்​கி​யத்​து​வம் பெற்​றுள்​ளது.​ ஆனால்,​​ உல​க​ளா​விய நிலை​யில் அதி​கம் விளை​வது மசூர் பருப்பு.​ இதைத்​தான் துவ​ரம்​ப​ருப்பு என்று அரசு சத்​து​ண​வுக் கூடங்​க​ளுக்கு வழங்​கு​கி​றது.​ தொன்​று​தொட்டே மசூர் துருக்​கியி​லி​ருந்து இந்​தி​யா​வுக்கு வந்த கார​ணத்​தால் இதற்​குத் துலுக்​கப்​ப​யறு என்று தமி​ழில் பெய​ருண்டு.​ ​

÷இந்​தி​யா​வி​லும் துலுக்​கப்​ப​யறு சிறிது விளை​கி​றது.​ இது சிவப்பு நிறத்​தில் இருக்​கும்.​ ருசி பாசிப்​ப​ருப்பு போல் இருக்​கும்.​ நன்கு வெந்​து​வி​டும்.​ வடக்​கில் பூண்டு,​​ தக்​கா​ளிப்​ப​ழம் சேர்த்து செய்​யப்​ப​டும் தால் ரொட்​டிக்​குத் தொட்​டுக் கொள்ள சுவை​யாக இருக்​கும்.​ பட்​டா​ணிப்​ப​ருப்பு மஞ்​சள்,​​ பச்சை என்று இரண்டு ரகங்​கள் ஆஸ்​தி​ரே​லி​யாவி​லி​ருந்து வரு​கி​றது.​ கெட்ட கேட்​டுக்​குக் கேச​ரிப்​ப​ருப்​பு​கூட இன்று கிலோ ரூ.​ 50 என்று விற்​கப்​ப​டு​கி​றது.​ உண​வில் இது அதி​க​மா​னால் முடக்​கு​வா​தம் வரும் நச்​சுப்​பொ​ருள் இயல்​பா​கவே உண்டு.​ அதே​ச​ம​யம் பருப்பு வகை​க​ளில் அதி​கம் புர​தச்​சத்து உள்ள பருப்​பும் கேச​ரிப்​ப​ருப்​பு​தான்.​ இது துவ​ரம்​ப​ருப்​பைப்​போல் இருக்​கும்.​ துவ​ரம்​ப​ருப்​போடு கலப்​ப​டம் செய்து நம்ம ஊர் மளி​கைக்​க​டை​க​ளில் விற்​கப்​ப​டு​வது உண்டு.​ அள​வு​டன் உண்​டால் பாதிப்பு இருக்​காது.​ அதை மட்​டுமே உண்​டால் முடங்க வேண்​டி​ய​து​தான்.​

​ இவ்​வாறு நாம் இந்​தி​யா​வில் விளை​யக்​கூ​டிய பல்​வ​கைப் பருப்​பு​க​ளின் அருமை பெரு​மை​களை எடுத்​துச் சொல்ல வேண்​டிய ஒரு கட்​டா​யத்​தில் வாழ்​கி​றோம்.​ இவ்​வ​ளவு சிறப்​புள்ள பருப்பு ரகங்​கள் இருந்​தும்​கூட இதன் உற்​பத்தி உய​ர​வில்லை.​ படிப்​ப​டி​யா​கக் குறை​கி​றது.​ பிரி​யாணி வழங்​கும் அர​சி​யல் இதை ஏன் கண்டு கொள்​ள​வில்லை?​ இந்​தி​யப் பருப்பு வகை​க​ளுக்கு ஏரா​ள​மான மருத்​து​வக் குண​மும் உண்டு.​

க​ட​லைப்​ப​ருப்பு பித்​த​நீர் சுரப்​ப​தைக் கட்​டுப்​ப​டுத்​தும்.​ பாசிப்​ப​ருப்​பும் துவ​ரம்​ப​ருப்​பும் வயிற்​றுப்​புண்ணை ஆற்​றும்.​ உளுந்து ஒப்​பற்ற மருந்து.​ சோடா​உப்பு சேர்க்​கா​மல் நல்ல எண்​ணெ​யில் செய்​யப்​ப​டும் அனு​மார் வடை ஆரோக்​கி​ய​மா​னது.​ வெந்​த​யத்​தைப்​போல் வயிற்​றுப்​புண்ணை ஆற்​றும்,​​ பேதி​யை​யும் நிறுத்​தும்.​

உ​ல​கி​லேயே அதி​கம் பருப்​பு​களை-​வகை​வ​கை​யா​கச் சாகு​படி செய்​யும் ஒரு பாரம்​பர்​யமே பாரத நாட்​டின் சிறப்பு.​ இந்​தச் சிறப்பு இனி எதிர்​கா​லத்​தில் இருக்​குமா?​ அழி​யுமா?​ பொறுப்​புள்ள அமைச்​சர்​கள்,​​ இருப்​பதை விட்​டு​விட்​டுப் பறப்​ப​தைப் பிடிப்​ப​தில் ஆர்​வ​மா​யுள்​ள​னர்.​ இந்த நிலை மாறி,​​ புர​தச்​சத்து இல்​லாத இந்​தி​யர்​க​ளுக்​குப் புர​தம் வழங்​கச் சட்​டி​யில் விதம்​வி​த​மான பருப்​பு​களை விழச் செய்​யும் ஒரு நன்​னாள் வர​வேண்​டும்.​ அன்​று​தான் பருப்பு வெந்து உள்​ளம் குளி​ரும்.

பெட்ரோல், டீசல் விலை மீண்டும் உயர்த்தப்படும்

புதுடில்லி : சர்வதேச சந்தையில் கச்சா எண்ணெயின் விலை உயர்ந்து வருவதால், பெட்ரோல், டீசல் விலையை மீண்டும் உயர்த்தலாம் என, பிரதமரின் பொருளாதார ஆலோசனைக் கவுன்சில் கருத்து தெரிவித்துள்ளது.

கவுன்சில் உறுப்பினர் கோவிந்தாராவ், டில்லியில் கூறியதாவது:சர்வதேச சந்தையில் கச்சா எண்ணெயின் விலை, பேரல் ஒன்றுக்கு 80 அமெரிக்க டாலரை விட உயரும் என எதிர்பார்க்கப்படுகிறது. இதை சமாளிக்க, இந்திய எண்ணெய் நிறுவனங்கள் பெட்ரோல், டீசல் விலையை உயர்த்த வேண்டி வரும்.அப்படி இல்லையெனில், எண்ணெய் நிறுவனங்களுக்கு பலமடங்கு இழப்பு ஏற்படும். இந்த இழப்பை அரசு ஏற்கும் பட்சத்தில், அதன் பாதிப்பு வரி செலுத்துவோரை பாதிக்கும். பெட்ரோல், டீசல் விலை உயர்வை நுகர்வோர் தான் ஏற்றுக் கொள்ள வேண்டும்; மாறாக வரி செலுத்துவோர் அல்ல.இவ்வாறு கோவிந்தாராவ் கூறினார்.

லோக்சபாவில் தாக்கல் செய்யப்பட்ட பட்ஜெட்டுக்கு பின், பெட்ரோல், டீசல் விலை லிட்டருக்கு இரண்டு ரூபாய்க்கும் அதிகமாக உயர்த்தப்பட்டதற்கு எதிர்க்கட்சிகள் கண்டனம் தெரிவித்து வரும் நிலையில், மீண்டும் அவற்றின் விலை உயரும் என பிரதமரின் பொருளாதார ஆலோசனைக் குழு உறுப்பினர் தெரிவித்துள்ளார்.

நேற்றைய கச்சா எண்ணெய் விலை சர்வதேச நிலவரப்படி 82 டாலர், நாம் வாங்கும் போது சராசரியாக, 80 டாலர் வரை விலை தரவேண்டியிருக்கும். தற்போது எண்ணெய் நிறுவனங்களான ஐ.ஓ.சி., - எச்.பி.சி.எல்., மற்றும் பி.பி.சி.எல்., ஆகியவை தினமும் 190 கோடி ரூபாய் இழப்பைச் சந்திக்கின்றன.இன்றைய நிலவரப்படி பெட்ரோல் லிட்டருக்கு ரூ. 4.97, டீசல் ரூ. 3.27 மண்ணெண்ணெய் ரூ.16.91 மற்றும் சமையல் எரிவாயு சிலிண்டர் ரூ.267.39 என இழப்பாகும் என்று பெட்ரோலியத் துறை செயலர் சுந்தரேசன் தெரிவித்தார்.இதே நிலை நீடித்தால் பெட்ரோலிய நிறுவனங்கள் வளர்ச்சித் திட்டத்திற்காக எதுவும் செலவழிக்க முடியாது என்றும் அவர் கூறினார்.

கண்துடைப்பு மசோதா!

மக்களவை மற்றும் சட்டப் பேரவைகளில் மகளிருக்கு 33 சதவிகித இடஒதுக்கீடு அளிக்கும் அரசியல் சட்டத்திருத்த மசோதா, மாநிலங்களவையில் தாக்கல் செய்யப்பட்டு, கடும் அமளிக்கு இடையில் நிறைவேற்றப்பட்டிருக்கிறது. சமாஜவாதி மற்றும் ராஷ்ட்ரீய ஜனதா தளக் கட்சிகள் இந்த மசோதாவுக்கு எதிராக முன்வைக்கும் வாதங்களையும், மசோதா நிறைவேறாமல் இருப்பதற்காக அவர்கள் கையாண்ட முறையையும் ஏற்றுக்கொள்ள முடியவில்லைதான். ஆனால், மகளிர் இடஒதுக்கீடு மசோதா பிரச்னையில் அவர்களுடைய கருத்திலும் நியாயம் இல்லாமல் இல்லை.

அடிப்படையிலேயே அரைவேக்காட்டுத்தனமானதும், உண்மையில் மகளிர் நலத்திலோ, மக்களாட்சித் தத்துவத்துக்கு மகத்துவம் சேர்க்கும் விதத்திலோ அமையாததுமான இந்த மகளிர் இடஒதுக்கீடு மசோதா என்பது சாதகங்களைவிட அதிகமான பாதகங்களை உள்ளடக்கிய ஒன்று என்பதுதான் உண்மை. இதன் மூலம் பயனடையப் போவது பெண்கள் என்பதைவிட, பெண்களைப் பகடைக்காய்களாக வைத்து அரசியல் நடத்த இருக்கும் அரசியல்வாதிகள்தான்.

கடந்த 14 ஆண்டுகளாக நாடாளுமன்றத்தில் நிறைவேற்ற முடியாமல் நான்கு மக்களவைத் தேர்தல்களைச் சந்தித்துவிட்ட இந்த மகளிருக்கான இடஒதுக்கீடு மசோதாவைப் பொறுத்தவரை, ஆரம்பம் முதலே சர்ச்சைக்குரிய ஒன்றாகவே இது இருந்து வந்திருக்கிறது. அடிப்படையில் பல சிக்கல்களையும், குறைபாடுகளையும் உள்ளடக்கிய இந்த மசோதாவைப் பற்றிய முறையான விவாதமோ, மாறுதலோ இல்லாமல் அவசரத்தில் அள்ளித் தெளித்த கோலமாக நிறைவேற்றுவதிலேயே முந்தைய ஐக்கிய முன்னணி, தேசிய ஜனநாயக முன்னணி அரசுகளும், இப்போதைய ஐக்கிய முற்போக்குக் கூட்டணி அரசும் குறியாக இருப்பது ஏன் என்பதுதான் புரியவில்லை.

சமாஜவாதி மற்றும் ராஷ்ட்ரீய ஜனதா தளக் கட்சிகளின் உள் ஒதுக்கீடு பிரச்னை ஒருபுறம் இருக்கட்டும். சிறுபான்மையினருக்கும், பிற்படுத்தப்பட்ட வகுப்பினருக்கும் மகளிர் மசோதாவில் உள் ஒதுக்கீடு தரப்பட வேண்டும் என்கிற அவர்களது வாதம் விதண்டாவாதம் என்றே நாம் வைத்துக் கொண்டாலும்கூட, இந்த இட ஒதுக்கீடு மசோதாவால் ஏற்பட இருக்கும் வேறு பல குறைபாடுகளை யார், எப்போது, எப்படிக் களைவது என்கிற கேள்விக்குப் பதிலில்லை. மசோதா நிறைவேற்றப்படட்டும், மாற்றங்களைப் பிறகு செய்து கொள்ளலாம் என்பது பொறுப்பற்றதனமாகத் தெரிகிறது.

அடிப்படையில் மகளிர் இடஒதுக்கீடு மசோதாவில் உள்ள கோளாறு, அதை நடைமுறைப்படுத்தும் முறையில்தான் இருக்கிறது. இந்த மசோதாவில் இன்றைய வடிவத்தின்படி, மொத்தமுள்ள மக்களவை மற்றும் சட்டப் பேரவைத் தொகுதிகளில் மூன்றில் ஒரு பங்கு இடங்கள் சுழற்சி முறையில் பெண்களுக்கான தொகுதியாகத் தேர்தலுக்குத் தேர்தல் ஒதுக்கப்பட இருக்கின்றன. இதுவே மக்கள் பிரதிநிதித்துவச் சட்டத்தின் அடிப்படை உணர்வுக்கு எதிரானதாக அமையும் தன்மையது.

உதாரணமாக, காங்கிரஸ் கட்சியைச் சேர்ந்த மத்திய தரைவழிப் போக்குவரத்துத்துறை அமைச்சர் கமல்நாத் மத்தியப் பிரதேசத்திலுள்ள சிந்த்வாரா என்கிற தொகுதியிலிருந்தும், மார்க்சிஸ்ட் கம்யூனிஸ்ட் கட்சியைச் சேர்ந்த மக்களவை உறுப்பினர் பாசுதேவ் ஆச்சார்யா மேற்கு வங்காளத்திலுள்ள பங்குரா என்கிற தொகுதியிலிருந்தும் கடந்த 1980-ம் ஆண்டு நடந்த ஏழாவது மக்களவைத் தேர்தல் முதல் எட்டு முறை தொடர்ந்து வெற்றி பெறுபவர்கள். தொகுதி மக்களின் நன்மதிப்பைப் பெற்றிருக்கும் இதுபோன்ற பல உறுப்பினர்கள், தங்களது தொகுதி மகளிருக்கு ஒதுக்கப்படுகிறது என்பதால், அந்தத் தொகுதியில் தேர்தலில் நிற்க முடியாமலும், அந்தத் தொகுதி மக்கள் தாங்கள் தொடர்ந்து ஆதரித்துவரும், தங்களுக்குச் சிறப்பாகச் செயல்பட்டு வரும் ஒரு பிரதிநிதியைத் தேர்ந்தெடுக்க முடியாமலும் தடுக்கப்படுமே, இது எப்படி மக்களாட்சித் தத்துவத்துக்கு உகந்ததாக இருக்கும்?

சட்டம் வந்தால் மட்டும்தான் பெண்களுக்கு நியாயம் கிடைக்கும் என்கிற வாதத்தில் அர்த்தமில்லை. உண்மைதான் பேச வேண்டும் என்று சட்டம் இயற்றப்பட வேண்டுமா என்ன?

மேலெழுந்தவாரியாக வாக்கு வங்கியைக் குறிவைத்து நாங்கள் பெண்களுக்குப் பெரிதாகச் செய்து விட்டோம் என்று சொல்லிக் கொள்ள காங்கிரஸ், பாரதிய ஜனதா மற்றும் இடதுசாரிகள் நடத்தும் கண்துடைப்பு நாடகமாகத்தான் மகளிர் இடஒதுக்கீடு மசோதா தெரிகிறது. இந்தக் கட்சிகளுக்கு உண்மையிலேயே மகளிருக்கு ஆட்சியிலும் அதிகாரத்திலும் அதிகப் பங்களிப்பு இருக்க வேண்டும் என்கிற அக்கறை இருந்தால், முதலில் தங்களது கட்சி அமைப்புகளிலும், செயற்குழு, பொதுக் குழுக்களிலும், அமைச்சரவைகளிலும் பெண்களுக்கு மூன்றில் ஒரு பங்கு இடம் ஒதுக்குவதுதானே. அதற்கு எந்தவிதச் சட்டமும் தேவையில்லையே.

அது போகட்டும். இந்த அரசியல் கட்சிகள் தங்களது வேட்பாளர் பட்டியலில் மூன்றில் ஒரு பங்கு இடங்களை மகளிருக்கு ஒதுக்குகின்றனவா என்றால் இல்லை. அப்படியிருந்தும் திறமையும் தகுதியும் வாய்ந்த மகளிர் கட்சித் தலைவியராகவும், முக்கியப் பொறுப்புகளிலும், அமைச்சர்களாகவும் இல்லாமலா போனார்கள்? சோனியா காந்தி, ஜெயலலிதா, மமதா பானர்ஜி, மாயாவதி, சுஷ்மா ஸ்வராஜ் என்று இந்தியாவின் சக்தி வாய்ந்த அரசியல்வாதிகள் பலரும் பெண்கள்தானே, யார் அவர்களது வளர்ச்சிக்குத் தடை போட முடிந்தது?

மகளிர் இடஒதுக்கீடு மசோதா நிறைவேற்றப்படுவதால் மட்டும் பல திறமையான மகளிர் அரசியலுக்கு வருவார்கள் என்று எதிர்பார்த்தால் ஏமாற்றம்தான் மிஞ்சும். அரைவேக்காட்டுத்தனமான இந்த மசோதாவால் ஏற்பட இருக்கும் பாதகங்கள்தான் சாதகங்களைவிட அதிகமாக இருக்கப் போகிறது. அப்படியானால் அரசியலிலும், ஆட்சி அதிகாரத்திலும் பெண்களுக்கு அதிகப் பங்களிப்பு ஏற்பட என்னதான் செய்ய வேண்டும் என்கிற கேள்வி எழுகிறது.

முதலில், அரசியல் சட்டத்தில் திருத்தம் கொண்டு வருவதைக் கைவிட்டு, அரசியல் கட்சிகளின் சட்டத்திட்டங்களில் மாற்றம் கொண்டுவரப்பட வேண்டும். எல்லா அரசியல் கட்சிகளும் தங்களது எல்லா அமைப்புகளிலும், பூத் கமிட்டியிலிருந்து செயற்குழு வரை, மகளிருக்கு சரிபாதி பங்களிப்பை உறுதிப்படுத்த வேண்டும். உள்ளாட்சித் தேர்தலிலிருந்து மக்களவைத் தேர்தல்வரை எல்லா தேர்தல்களின் வேட்பாளர் பட்டியலிலும் சரிபாதி இடங்களில் மகளிர் வேட்பாளர்களாக நிறுத்தப்பட வேண்டும்.

அப்படிச் செய்யும்போது, சிறுபான்மையினர், பிற்படுத்தப்பட்டவர்கள் மட்டுமல்ல, எல்லாத் தரப்பு மக்களுக்கும் பிரதிநிதித்துவம் கிடைப்பதுடன் மிக அதிக அளவில் ஆட்சி அதிகாரத்தில் மகளிரின் பங்களிப்பு உறுதி செய்யப்படும். அரசியல் சட்டத்திருத்தத்தின் மூலம் மக்களாட்சித் தத்துவத்தின் அடிப்படை உணர்வு தடம் புரளும் என்பதுடன், அதிக அளவில் அரசியல்வாதிகளின் "பினாமி'க்கள் தேர்ந்தெடுக்கப்படும் அபாயம்தான் ஏற்படும்.

மகளிர் இடஒதுக்கீடு மசோதா ஒரு கண்துடைப்பு மசோதா. அதனால் இது நிறைவேறாமல் போனால் நல்லது... மகளிருக்கு மட்டுமல்ல, நாட்டுக்கும்!

அமோக ஆதரவுடன் பெண்கள் மசோதா வெற்றி : ராஜ்யசபாவில் மூன்றில் இரண்டு பங்கு கிடைத்தது

புதுடில்லி : லோக்சபா மற்றும் மாநில சட்டசபைகளில் பெண்களுக்கு 33 சதவீத இடஒதுக்கீடு அளிக்க வகை செய்யும் சட்ட மசோதா நேற்று ராஜ்யசபாவில் அமோக ஆதரவுடன் நிறைவேறியது. மசோதாவுக்கு ஆதரவாக 186 எம்.பி.,க்களும், எதிர்ப்பாக ஒரே ஒரு எம்.பி.,யும் ஓட்டளித்தனர். மூன்றில் இரண்டு பங்கிற்கு மேலான உறுப்பினர்கள் ஆதரவு தெரிவித்தனர். மசோதா நிறைவேறியதன் மூலம், 14 ஆண்டு கால கனவு நனவாகியுள்ளது.

லோக்சபா மற்றும் மாநில சட்டசபைகளில் பெண்களுக்கு 33 சதவீத இடஒதுக்கீடு அளிக்க வேண்டும் என்ற கோரிக்கை பல ஆண்டுகளாக எழுந்தது. இதையடுத்து, பெண்கள் இடஒதுக்கீடு மசோதா தயார் செய்யப் பட்டு, ராஜ்யசபாவில் தாக்கல் செய்யப்பட்டது. ஆனால், இந்த மசோதாவில், இதர பிற்பட்ட மற்றும் சிறுபான்மை வகுப்பைச் சேர்ந்த பெண்களுக்கும் உள்ஒதுக்கீடு அளிக்க வேண்டும் என, முலாயம்சிங்கின் சமாஜ்வாடி, லாலு பிரசாத்தின் ராஷ்டிரிய ஜனதா தளம், மாயாவதியின் பகுஜன் சமாஜ், ஐக்கிய ஜனதா தளம் போன்ற கட்சிகள் வலியுறுத்தின.அதனால், ராஜ்யசபாவில் தாக்கல் செய்யப்பட்ட மசோதா, பார்லிமென்ட் நிலைக்குழுவின் பரிசீலனைக்கு அனுப்பப்பட்டது. நிலைக்குழுவும், மசோதாவை தற்போதைய நிலையிலேயே நிறைவேற்ற ஆதரவு தெரிவித்தது. இதையடுத்து, மசோதாவை மீண்டும் பார்லிமென்டில் தாக்கல் செய்ய மத்திய அமைச்சரவை ஒப்புதல் கொடுத்தது.

இதையடுத்து, நேற்று முன்தினம் இந்த மசோதா ராஜ்யசபாவில் தாக்கல் செய்யப்பட்டது. மசோதாவிற்கு எதிர்ப்பு தெரிவித்து நேற்று முன்தினமும், நேற்றும் சமாஜ் வாடி, ராஷ்டிரிய ஜனதா தளம் உட்பட சில கட்சிகளின் எம்.பி.,க்கள் ரகளையில் ஈடுபட்டனர். இதனால், ஏழு எம்.பி.,க்கள் நேற்று சஸ்பெண்ட் செய்யப்பட்டனர்.இதன்பின் மசோதாவின் மீது விவாதம் நடைபெற்றது. எதிர்க்கட்சித் தலைவர் அருண் ஜெட்லி உட்பட பல்வேறு கட்சிகளின் தலைவர்களும் பேசினர். இறுதியாக, மசோதா ஓட்டெடுப்பிற்கு விடப்பட்டது. ராஜ்யசபாவில் மொத்த உறுப்பினர்களின் எண்ணிக்கை 245. இவர்களில் 233 பேர் நேற்று சபைக்கு வந்திருந்தனர். இவர்களில் 155 பேரின் ஆதரவு தேவை. ஆனால், 186 எம்.பி.,க்கள் மசோதாவுக்கு ஆதரவாக ஓட்டளித்தனர். ஒரே ஒரு எம்.பி., மட்டும் மசோதாவுக்கு எதிராக ஓட்டளித்தார். இதன்மூலம் மூன்றில் இரண்டு பங்கு பெரும் பான்மை உறுப்பினர்களின் அமோக ஆதரவுடன், பெண்கள் மசோதா நிறைவேறியதன் மூலம் வரலாறு படைக்கப்பட்டது.

மசோதாவுக்கு ஆதரவாக காங்கிரஸ், பாரதிய ஜனதா மற்றும் இடதுசாரி கட்சிகள் ஓட்டளித்தன.வரலாற்று சிறப்புமிக்க இந்த அரசியல் சட்டத் திருத்த மசோதா நிறைவேற்றப்பட்டதன் மூலம், உலகின் பெரிய ஜனநாயக நாடான இந்தியாவில் புதிய அரசியல் சகாப்தம் துவங்கியுள்ளது.ராஜ்யசபாவில் நிறைவேறியுள்ள இந்த மசோதா, இனி லோக்சபாவில் தாக்கல் செய்யப்பட்டு நிறைவேற்றப்படும். லோக்சபாவிலும் மூன்றில் இரண்டு பங்கு பெரும்பான்மையுடன் மசோதா நிறைவேறும் என, எதிர்பார்க்கப்படுகிறது.

வெளிநடப்பு: பெண்கள் இடஒதுக்கீடு மசோதா மீது, ராஜ்யசபாவில் நேற்று நடந்த ஓட்டெடுப்பின் போது, ஆளும் ஐக்கிய முற்போக்கு கூட்டணியில் பங்கேற்றுள்ள திரிணமுல் காங்கிரஸ் கட்சியைச் சேர்ந்த இரண்டு உறுப்பினர்கள் பங்கேற்கவில்லை. அதேபோல், மசோதாவை தற்போதைய நிலையில் நிறைவேற்றக் கூடாது என, எதிர்ப்பு தெரிவித்த பகுஜன் சமாஜ் கட்சி உறுப்பினர்கள் 15 பேரும், ஓட்டெடுப்பிற்கு முன்னதாக சபையில் இருந்து வெளிநடப்பு செய்தனர்.மசோதாவை தற்போதைய நிலையில் நிறைவேற்ற ஐக்கிய ஜனதா தளம் கட்சியின் தலைவர் சரத் யாதவ் எதிர்ப்பு தெரிவித்தாலும், அந்தக் கட்சியைச் சேர்ந்த பீகார் முதல்வர் நிதிஷ்குமார் ஆதரவு தெரிவித்ததால், அந்தக் கட்சியைச் சேர்ந்த எம்.பி.,க்கள் ஏழு பேரும் மசோதாவுக்கு ஆதரவாக ஓட்டளித்தனர். அதேபோல், அ.தி.மு.க., தெலுங்கு தேசம் போன்ற கட்சிகளும் மசோதாவுக்கு ஆதரவு அளித்தன

.பார்லிமென்டின் இரு சபைகளிலும் இந்த மசோதா நிறைவேறி விட்டால், லோக்சபாவில் மொத்தமுள்ள தேர்ந்தெடுக்கப்படும் 543 எம்.பி.,க்களில், 181 பேர் பெண்களாக இருப்பர். அதேபோல், 28 மாநிலங்களில் உள்ள சட்டசபைகளில் மொத்தமுள்ள 4,109 எம்.எல்.ஏ.,க்களில் 1,370 பேர் பெண்களாக இருப்பர். ஒருவகையில் ஆண்கள் பிரதிநிதித்துவம் குறையும். ஆனால், மொத்த எண்ணிக்கையில் பாதி பேர் பெண்கள் என்பதை பலரும் மறந்தனர். ஆப்கன், பாகிஸ்தான் போன்ற நாடுகளில் உள்ள பிரதிநிதித்துவ சதவீதம் இங்கே இல்லை என்பதும் குறிப்பிடத்தக்கது.

மசோதா மீது விவாதம் நடந்த போது குறுக்கிட்டு பேசிய பிரதமர் மன்மோகன் சிங், "இந்தச் சட்டம் வரலாற்று முக்கியத்துவம் வாய்ந்தது. பெண்களுக்கு அதிகாரம் அளிக்க மேற்கொண்ட மிகப்பெரிய நடவடிக்கை. இது சிறுபான்மையினருக்கோ அல்லது தாழ்த்தப் பட்டோர் அல்லது மலைவாழ் பழங்குடியினருக்கோ எதிரானது அல்ல' என்றார்.

பெண்கள் மசோதா: அன்று முதல் இன்று வரை... :

1974: நாட்டில் பெண்களின் நிலை தொடர்பாக ஆய்வு செய்ய நியமிக்கப்பட்ட கமிட்டி, மத்திய கல்வி மற்றும் சமூக நலத்துறை அமைச்சகத்திடம் அறிக்கை சமர்ப்பித்தது. அதில், பார்லிமென்டில் பெண்களுக்கு பிரதிநிதித்துவம் அளிக்க வேண்டும் என, தெரிவிக்கப்பட்டது.

1993: பஞ்சாயத்துகள் மற்றும் நகராட்சி அமைப்புகளில், பெண்களுக்கு மூன்றில் ஒரு பங்கு இடங்களை ஒதுக்க வகை செய்யும் 73 மற்றும் 74வது அரசியல் சட்டத் திருத்த மசோதா நிறைவேற்றப்பட்டது.

1996 (செப்டம்பர் 12): தேவகவுடா தலைமையிலான அரசு பதவியில் இருந்த போது, 81வது அரசியல் சட்டத் திருத்தமாக பெண்கள் இடஒதுக்கீடு மசோதா, பார்லிமென்டில் அறிமுகம் செய்யப்பட்டது. அதன்பின், கவுடா அரசு சிறுபான்மை அரசாகி விட்டதால், 11வது லோக்சபா கலைக்கப்பட்டது.

1998 (ஜூன் 26): 12வது லோக்சபாவில், 84வது அரசியல் சட்டத் திருத்த மசோதாவாக தேசிய ஜனநாயக கூட்டணி அரசு, இந்த மசோதாவை தாக்கல் செய்தது. இந்த முறையும், வாஜ்பாய் அரசு சிறுபான்மை அரசாகி, லோக்சபா கலைக்கப்பட்டதால், மசோதா நிறைவேறாமல் போனது.

1999 (நவம்பர் 22): 13வது லோக்சபாவில் தேசிய ஜனநாயக கூட்டணி அரசால், இந்த மசோதா மீண்டும் அறிமுகம் செய்யப்பட்டது. ஆனால், ஒருமித்த கருத்தை எட்ட முடியவில்லை என்பதால், மசோதா நிறைவேற்றப்படவில்லை. 2002 மற்றும் 2003ல் இந்த மசோதா மீண்டும் தாக்கல் செய்யப்பட்டாலும், நிறைவேற்ற முடியவில்லை.

2008 (மே 6) : ஐக்கிய முற்போக்கு கூட்டணி அரசால், ராஜ்யசபாவில் இம்மசோதா தாக்கல் செய்யப்பட்டு, சட்டம் மற்றும் நீதித்துறை தொடர்பான பார்லிமென்ட் நிலைக்குழுவின் பரிசீலனைக்கு அனுப்பப்பட்டது.

2009 (டிசம்பர் 17): நிலைக்குழு தன் அறிக்கையை சமர்ப்பித்தது. பார்லிமென்டின் இரு சபைகளிலும் மசோதாவை தாக்கல் செய்யலாம் என, தெரிவித்தது.

2010 (பிப்ரவரி 22): பார்லிமென்டின் கூட்டுக் கூட்டத்தில் உரை நிகழ்த்திய ஜனாதிபதி பிரதிபா பாட்டீல், பெண்கள் இடஒதுக்கீடு மசோதா நிச்சயம் நிறைவேற்றப்படும் என்றார்.

2010 (பிப்ரவரி 25): பெண்கள் இடஒதுக்கீடு மசோதாவுக்கு மத்திய அமைச்சரவை ஒப்புதல் அளித்தது.

2010 (மார்ச் 8): ராஜ்யசபாவில் மீண்டும் மசோதா தாக்கல் செய்யப்பட்டது. வரலாறு காணாத அளவிலான ரகளை அரங்கேறியது.

2010 (மார்ச் 9): பெண்கள் இடஒதுக்கீடு மசோதா, ராஜ்யசபாவில் மூன்றில் இரண்டு பங்கு எம்.பி.,க்களின் ஆதரவுடன் நிறைவேற்றப்பட்டது.

ஆஸ்கர் விருதுப் பட்டியல்

இந்த ஆண்டுக்கான ஆஸ்கர் விருதுகள் வழங்கும் நிகழ்ச்சி அமெரிக்காவின் லாஸ் ஏஞ்சல்ஸ் நகரில் நடந்தது. திரைப்படங்களில் பல்வேறு பிரிவுகளுக்கான விருதுகள் அறிவிக்கப்பட்டுள்ளன. ஹர்ட் லாக்கர், கிரேஸி ஹார்ட், அவதார் போன்ற படங்கள் அதிக விருதுகளைப் பெற்றிருக்கின்றன.

அதன் விவரம்:

சிறந்த படம்: ஹர்ட் லாக்கர், இயக்குனர்: கேத்ரீன் பிக்லோ

சிறந்த நடிகர்: ஜெஃப் பிரிட்ஜெஸ், படம்: கிரேஸி ஹார்ட்

சிறந்த நடிகை: சாண்ட்ரா புல்லக், படம்: ப்ளைன்ட் சைடு.

சிறந்த இயக்குனர்: கேத்ரின் பிக்லோ, படம்: தி ஹர்ட் லாக்கர்.

முழுநீள ஆவணப்படம் : தி கோவ்

எடிட்டிங் : பாப், முராவ்ஸ்கி, கிரஸ் இன்னிஸ், படம்: ஹர்ட் லாக்கர்

வெளிநாட்டு மொழிப்படம்: தி சீக்ரட் இன் தேர் ஐஸ் (எல் சீக்ரெடோ டி சுஸ் ஓஜோஸ்) - அர்ஜென்டினா

விஷுவல் எஃபெக்ட்ஸ்: ஜோ லெட்டெரி, ஸ்டீபன் ரோசென்பம், ரிச்சர்ட் பனேஹம், ஆன்ட்ரூ ஆர்.ஜோன்ஸ், படம் அவதார்

இசை ( பாடல்): ரியான் பிங்கோம், டிபோன் பர்னெட், படம்: கிரேஸி ஹார்ட்

இசை (பின்னணி): மைக்கேல் கியாசினோ, படம்: அப்

மேக்-அப்: பார்னே பர்மன், மின்டி ஹால், ஜோயல் ஹார்லோ,படம்: ஸ்டார் ட்ரெக்

ஒளிப்பதிவு: மௌரோ பியோரே, படம்: அவதார்

கலை இயக்குனர் : ரிக் கார்ட்டர், ராபர்ட் ஸ்ட்ரோம்பெர்க், கிம் சின்ங்ளேர், படம் - அவதார்

சவுண்ட் மிக்சிங் : பால் என்.ஜே. ஓட்டோசன், ரே பெக்கெட்,படம்: ஹர்ட் லாக்கர்

ஆடை வடிவமைப்பு: சான்டி பவல், படம்: யங் விக்டோரியா

அனிமேஷன் படம்: அப்

துணை நடிகர்: கிறிஸ்டோபர் வால்ட்ஸ், படம்: இங்லூரியஸ் பாஸ்டெர்ட்ஸ்

துணை நடிகை: மோனிக், படம்: ப்ரீஸியஸ்.

திரைக்கதை: மார்க் போல், படம்: தி ஹர்ட் லாக்கர்

தழுவல் திரைக்கதை: ஜெஃப்ரி ஃப்ளெட்சர்: படம்- பிரீஸியஸ்

ஆவணப்படம்: மியூசிக் பை ப்ரூடன்ஸ்

அனிமேஷன் குறும்படம்: லோகோரமா

குறும்படம்: தி நியூ டெனன்ட்ஸ்